بھارت کی سب سے بڑی فضائی کمپنی انڈیگو کے ایک مسافر طیارے کو تکنیکی خرابی کے باعث گزشتہ رات پاکستان کے شہر کراچی کے جناح انٹرنیشنل ایئرپورٹ پر ہنگامی لینڈنگ کرنا پڑی۔
انڈیگو کی یہ مسافر پرواز متحدہ عرب امارات میں شارجہ سے بھارتی شہر حیدرآباد جا رہی تھی کہ پائلٹ کو کراچی میں طیارہ اُتارنا پڑا۔ گزشتہ دو ہفتوں سے بھی کم عرصے میں کسی بھارتی مسافر طیارے کی کراچی میں ہنگامی لینڈنگ کا یہ دوسرا واقعہ ہے۔
The replacement IndiGo aircraft (IG 9002) left with 2 crew members only at 1608 hours. The plane that made technical landing earlier in wee hours (IGO 1406) departed at 1630 hours with 193 people on board including 6 crew members. https://t.co/1inNDP86ou
— PCAAOfficial (@official_pcaa) July 17, 2022
Advertisement
خبر رساں ادارے روئٹرز کے مطابق انڈیگو نے اس واقعے کی تصدیق تو کی ہے تاہم یہ نہیں بتایا کہ یہ واقعہ کب پیش آیا۔ انڈیگو کی طرف سے میڈیا کے لیے جاری کردہ ایک بیان میں کہا گیا ہے کہ انڈیگو کی پرواز 6E-1406 جو شارجہ سے حیدرآباد جا رہی تھی، کو رخ موڑ کر کراچی اُتارنا پڑا۔ جہاز کے پائلٹ نے طیارے میں ایک تکنیکی خرابی کی نشاندہی کی تھی۔
بیان کے مطابق اس صورتحال میں ضروری طریقِ کار پر عمل کرتے ہوئے احتیاطی اقدامات کے تحت جہاز کا رخ کراچی کی طرف کر دیا گیا۔ بعد ازاں انڈیگو کی طرف سے یہ بھی کہا گیا کہ کمپنی ایک اضافی پرواز کراچی بھیجنے کی تیاریاں کر رہی ہے تاکہ وہاں موجود مسافروں کو بھارتی شہر حیدر آباد لایا جا سکے۔
پرواز میں سوار بھارتی مسافروں نے پاکستانی مہمان نوازی کا شکریہ ادا کیا اور اُن میں سے بعض نے دوبارہ یہاں آنے کی خواہش کا اظہار بھی کیا۔ پاکستانی سول ایوی ایشن اتھارٹی کی جانب سے مسافروں کو تبصروں کے لیے دیے گئے کارڈز پر ایک مسافر نے لکھا کہ اُنہوں نے ہمارے ساتھ وی آئی پی جیسا اچھا سلوک کیا جس پر وہ پاکستان کا شکریہ ادا کرتے ہیں۔
ایک اور مسافر زین سید نے ٹوئٹر پر دلچسپ تبصرہ بھی کیا کہ ” کیا تمام بھارتی پائلٹ بریانی کھانے کے لیے کراچی میں رُکنا چاہتے ہیں؟ “
Are all Indian Pilots seems to like stop over at Karachi for Biryani?
— Zain Syed (@zainjournalist) July 17, 2022
یاد رہے کہ اس واقعے سے صرف 12 دن پہلے بھی یعنی 5 جولائی کو ایک اور بھارتی نجی ایئرلائن اسپائس جیٹ کی نئی دہلی سے دبئی جانے والی ایک مسافر پرواز کو بھی کراچی میں ہنگامی لینڈنگ کرنا پڑی تھی۔