صاف ستھری قمیض یا شرٹ پہننے کے باوجود اگر کالر پر پیلے یا گہرے میل کے نشان موجود ہوں تو پوری شرٹ پرانی اور میلی دکھائی دینے لگتی ہے۔ بعض اوقات عام واشنگ کے بعد بھی یہ ضدی نشان مکمل طور پر صاف نہیں ہوتے۔
دلچسپ بات یہ ہے کہ اس کیلئے کسی مہنگے اسٹین ریموور کی ضرورت نہیں، آپ کے باتھ روم میں موجود عام ہیئر شیمپو بھی کالر کی صفائی میں مددگار ثابت ہو سکتا ہے۔
کالر پر یہ ضدی میل آتا کہاں سے ہے؟
قمیض کا کالر مسلسل گردن کی جلد کے ساتھ لگا رہتا ہے۔ پسینہ، جلد سے خارج ہونے والا قدرتی تیل یعنی سیبم، ڈیڈ اسکن، گردوغبار اور بعض بیوٹی یا ہیئر پراڈکٹس آہستہ آہستہ کپڑے پر جمع ہوتے رہتے ہیں۔
وقت کے ساتھ یہی چکنائی اور میل کالر کے کناروں پر پیلی یا گہری تہہ کی شکل اختیار کر سکتے ہیں، جسے صرف عام دھلائی سے نکالنا مشکل ہو جاتا ہے۔
شیمپو کالر کی صفائی میں کیسے مدد کرتا ہے؟
شیمپو صرف بالوں کیلئے خوشبو دار مائع نہیں بلکہ اسے بالوں اور سر کی جلد سے تیل اور چکنائی صاف کرنے کیلئے تیار کیا جاتا ہے۔
اس میں موجود صفائی کرنے والے اجزا یعنی سرفیکٹنٹس تیل اور میل کو کپڑے سے ڈھیلا کرنے میں مدد دیتے ہیں تاکہ پانی کے ساتھ اسے دھونا آسان ہو جائے۔
چونکہ کالر پر جمع ہونے والے میل کا ایک اہم حصہ بھی جلد کی چکنائی اور پسینے سے جڑا ہوتا ہے، اس لیے شیمپو ایسے نشانات پر ایک آسان پری ٹریٹمنٹ کے طور پر کام آسکتا ہے۔
شیمپو سے کالر کیسے صاف کریں؟
سب سے پہلے کالر کے میلے حصے کو ہلکے پانی سے نم کریں اور اس پر تھوڑا سا عام شیمپو لگا دیں۔ انگلیوں یا نرم ٹوتھ برش سے بہت ہلکے ہاتھ سے اسے رگڑیں تاکہ شیمپو کپڑے کے ریشوں تک پہنچ جائے۔
اسے تقریباً 5 سے 15 منٹ کیلئے چھوڑ دیں اور پھر قمیض کو معمول کے مطابق واشنگ مشین یا ہاتھ سے دھولیں۔
نوٹ:
نازک، رنگ چھوڑنے والے یا خصوصی دیکھ بھال والے کپڑوں پر پہلے کسی چھپی ہوئی چھوٹی جگہ پر شیمپو آزما لینا بہتر ہے۔ سختی سے رگڑنے سے بھی گریز کریں کیونکہ اس سے کپڑے کے ریشے متاثر ہو سکتے ہیں۔