واشنگٹن: امریکی صدر ڈونلڈ ٹرمپ نے ایران کو خبردار کیا ہے کہ اگر پِک ایکس ماؤنٹین میں مشکوک سرگرمیاں جاری رہیں تو امریکا اس مقام کو نشانہ بنا سکتا ہے۔
رائٹرز کے مطابق ٹرمپ نے ریپبلکن پارٹی کے مڈٹرم کنونشن سے خطاب کرتے ہوئے ایران کو محتاط رہنے کا مشورہ دیا اور کہا کہ پِک ایکس کے مقام پر کچھ سرگرمی دیکھی گئی ہے۔
انہوں نے خبردار کیا کہ اگر ایران نے کوئی ’چالاکی‘ کی تو امریکا اسے سخت جواب دے گا۔
پِک ایکس ماؤنٹین ایران کے اہم جوہری مرکز نطنز کے قریب واقع ایک انتہائی محفوظ زیرِ زمین تنصیب ہے، جہاں گہرائی میں موجود دو سرنگوں کے کمپلیکس قائم ہیں۔ نطنز کی جوہری تنصیب حالیہ حملوں میں شدید متاثر ہوچکی ہے۔
ٹرمپ اس سے قبل بھی جولائی کے وسط سے پِک ایکس ماؤنٹین کو نشانہ بنانے کی دھمکیاں دیتے رہے ہیں۔ تازہ بیان سے ظاہر ہوتا ہے کہ واشنگٹن ایران کی زیرِ زمین جوہری اور فوجی تنصیبات پر نظر رکھے ہوئے ہے۔