صومالیہ کے ساحلی شہر کسمایو کے ایک ہوٹل کے گیٹ سے دھماکہ خیز مواد سے بھری کار ٹکرا گئی جس کے نتیجے میں تین افراد ہلاک ہو گئے۔
تفصیلات کے مطابق سرکاری ٹی وی کا کہنا ہے کہ کسمایو کے توکل ہوٹل کو سکیورٹی فورسز نے گھیرے میں لے لیا ہے، دھماکے کے بعد فائرنگ بھی کی گئی۔
پولیس نے میڈیا کو بتایا کہ دھماکہ خیز مواد سے لدی ایک کار صومالیہ کے بندرگاہی شہر کسمایو کے وسط میں واقع ایک ہوٹل کے گیٹ سے ٹکرا گئی جس کے بعد فائرنگ کے نتیجے میں کم از کم تین افراد ہلاک ہو گئے۔
سرکاری صومالی نیشنل ٹیلی ویژن نے ٹویٹر پر کہا کہ سیکیورٹی فورسز ہوٹل میں ایک دہشت گردی کے واقعے سے نمٹ رہی ہیں۔
پولیس آفیسر محمد نور نے کسمایو میں ایک خبر رساں ادارے کو بتایا کہ توکل ہوٹل میں ایک دھماکا ہوا ہے اور فائرنگ کی آوازیں سنائی دے رہی ہیں.
Advertisement
ایک سیکیورٹی افسر فرح محمد نے خبر رساں ادارے کو بتایا کہ تین ہلاکتوں کے علاوہ آٹھ افراد زخمی ہوئے جنہیں کسمایو ہسپتال لے جایا گیا۔ عینی شاہدین نے بتایا کہ فائرنگ شروع ہونے سے پہلے ایک زوردار دھماکے کی آواز سنی گئی۔
کسمایو میں ایک دکاندار فرح علی نے رائٹرز کو بتایا کہ سیکیورٹی فورسز نے جائے وقوعہ کا محاصرہ کر لیا ہے۔ فوری طور پر یہ واضح نہیں ہو سکا کہ اس حملے کا ذمہ دار کون تھا۔
موغادیشو سے صحافی جامع نور احمد نے ایک اہلکار کے حوالے سے بتایا کہ سیکورٹی فورسز اور جنگجوؤں کے درمیان فائرنگ کا تبادلہ ابھی بھی جاری ہے۔
Advertisement