بالی ووڈ کی اداکارہ گایتری جوشی اور ان کے شوہر وکاس اوبرائے اٹلی میں خطرناک کار حادثے کا شکار ہو گئے، حادثہ تیز رفتاری کے باعث پیش آیا، جس کی ویڈیو منظرِ عام پر آ گئی۔
بھارتی میڈیا کی رپورٹس کے مطابق اداکارہ گایتری جوشی 2004ء میں ریلیز ہونے والی شاہ رخ خان کی فلم ’سوادیس‘ میں ان کے مدِ مقابل نظر آئیں تھی۔
اب حال ہی میں اداکارہ اپنے شوہر کے ہمراہ اٹلی میں چھٹیاں گزار رہی تھیں کہ سفر کے دوران ان کی گاڑی کو خطرناک جان لیوا حادثہ پیش آیا۔
میڈیا رپورٹس کے مطابق مبینہ طور پر گایتری اور ان کے شوہر کی گاڑی کئی دیگر گاڑیوں اور ایک کیمپر وین سے ٹکرا گئی۔
اداکارہ کے منیجر کے مطابق اس جان لیوا حادثے میں اداکارہ اور ان کے شوہر محفوظ اور ٹھیک ہیں۔
سوشل میڈیا پلیٹ فارم ایکس (سابق ٹوئٹر) پر ایک صارف نے اس ہولناک واقعے کی ویڈیو شیئر کی جس میں دیکھا جاسکتا ہے کہ حادثہ تیز رفتاری کے باعث اس وقت پیش آیا جب ایک فراری کیمپر وین کو اوور ٹیگ کرنے کی کوشش کرتے ہوئے اس سے ٹکرا گئی۔
اس حادثے کے نتیجے میں جائے وقوع پر کیمپر وین الٹ گئی اور دیگر گاڑیاں اس سے ٹکرا گئیں جبکہ فراری میں آگ لگ گئی۔
میڈیا رپورٹس کے مطابق فراری میں آگ لگنے سے 2 افراد ہلاک ہو گئے جن میں سوئٹزر لینڈ سے تعلق رکھنے والا 63 سالہ خاتون میلیسا کراؤٹلی اور 67 سالہ مارکس کراؤٹلی نامی شخص شامل ہیں۔
خیال رہے کہ گایتری جوشی نے فلم ’سوادیس‘ سے ڈیبیو کیا اور اس کے بعد کسی اور فلم میں کام نہیں کیا، انہیں اس فلم میں شاندار کارکردگی کے باعث 4 ایوارڈز سے نوازا گیا تھا۔