دبئی (اردوویکلی)::متحدہ عرب امارات کے نائب صدر اور وزیر اعظم اور دبئی کے حکمران عزت مآب شیخ محمد بن راشد المکتوم کی دعوت پر وزیراعظم پاکستان محمد شہباز شریف 10 سے 11 فروری تک متحدہ عرب امارات (یو اے ای) کا دو روزہ سرکاری دورہ کریں گے اس دوران وہ ورلڈگورنمنٹس سمٹ 2025 میں شرکت کریں۔
سربراہی اجلاس گورننس، اختراعات اور بین الاقوامی تعاون کے مستقبل پر تبادلہ خیال کے لیے ریاستوں/حکومتوں کے سربراہان، عالمی پالیسی سازوں، اور نجی شعبے کی سرکردہ شخصیات کی ایک بڑی تعداد کو اکٹھا کرے گا۔
عہدہ سنبھالنے کے بعد وزیر اعظم محمد شہباز شریف کا متحدہ عرب امارات کایہ دوسرا دورہ ہے۔ ان کے ساتھ نائب وزیر اعظم/ وزیر خارجہ سینیٹر محمد اسحاق ڈار اور کابینہ کے دیگر اہم ارکان سمیت ایک اعلیٰ سطحی وفد بھی ہو گا، جو متحدہ عرب امارات اور دیگر عالمی شراکت داروں کے ساتھ اپنے تعلقات کو مزید گہرا کرنے کے لیے پاکستان کے مضبوط عزم کی عکاسی کرتا ہے۔
اپنے دورے کے دوران، وزیراعظم ورلڈگورنمنٹس سمٹ 2025میں کلیدی خطاب کریں گے، جس میں جامع اقتصادی ترقی، ڈیجیٹل تبدیلی اور گورننس اصلاحات کے لیے پاکستان کے وژن کو اجاگر کیا جائے گا۔ وہ متحدہ عرب امارات کی قیادت کے ساتھ دوطرفہ ملاقاتیں بھی کریں گے اور شریک ممالک کے سربراہان مملکت/حکومت اور بڑی ملٹی نیشنل کمپنیوں کے سرکردہ چیف ایگزیکٹوآفسیرز سے بھی ملاقات کریں گے۔
پاکستان اور متحدہ عرب امارات کے درمیان گہرے برادرانہ تعلقات ہیں جو باہمی اعتماد، افہام و تفہیم اور دیرینہ باہمی فائدہ مند تعاون پر قائم ہیں۔ متحدہ عرب امارات پاکستان کے اہم اقتصادی اور اسٹریٹجک شراکت داروں میں سے ایک ہے، جس کے متعدد شعبوں میں مضبوط تعاون ہے۔متحدہ عرب امارات میں پاکستانی تارکین وطن، جو دنیا بھر میں پاکستانی تارکین وطن کی دوسری بڑی کمیونٹی ہے، دونوں ممالک کی ترقی اور کامیابی میں ایک اہم کردار ادا کر رہی ہے، جو دونوں ممالک کے درمیان ایک پل کا کام کر رہی ہے۔
وزیراعظم کا دورہ متحدہ عرب امارات کے ساتھ اپنے تعلقات کو مزید مضبوط بنانے، وسیع تر اقتصادی تعاون کو فروغ دینے اور باہمی خوشحالی کے لیے شراکت داری کی نئی راہیں تلاش کرنے کے لیے پاکستان کے غیر متزلزل عزم کی نشاندہی کرتا ہے۔
