سفیرپاکستان شفقت علی خان کی پاکستان بزنس کونسل دبئی کے وفد سے ملاقات![]()
دبئی (نیوزڈیسک)::متحدہ عرب امارات میں پاکستان کے سفیر شفقت علی خان، نے آج قونصلیٹ جنرل آف پاکستان دبئی میں پاکستان بزنس کونسل دبئی کے ایک وفد سے ملاقات کی۔ وفد کی قیادت چیئرمین پاکستان بزنس کونسل دبئی محمد شبیر مرچنٹ نے کی، جبکہ وفد میں مینجمنٹ کمیٹی کے اراکین کامران احمد ریاض، افتخار علی تتلہ، نور کریم آفریدی، سلیم تابانی اور محمد اقبال داؤد شامل تھے۔ ملاقات میں ٹریڈ اینڈ انویسٹمنٹ قونصلرعلی زیب خان، اور قونصلیٹ کے دیگر افسران بھی موجود تھے۔
سفیر شفقت علی خان نے پاکستان بزنس کونسل کی جانب سے پاکستان اور متحدہ عرب امارات کے مابین تجارت، سرمایہ کاری اور اقتصادی روابط کے فروغ کے لیے کی جانے والی کوششوں کو سراہا۔ انہوں نے دو طرفہ تجارت کو مضبوط بنانے اور متحدہ عرب امارات میں پاکستانی کاروباری برادری کو سہولت فراہم کرنے کے لیے پاکستان بزنس کونسل کے اقدامات کی بھرپور حمایت کا اعادہ کیا۔ پاکستان اور متحدہ عرب امارات کے مابین تاریخی اور برادرانہ تعلقات کو اجاگر کرتے ہوئے، سفیر نے اس امر پر زور دیا کہ دو طرفہ تجارت اس شراکت داری کو مزید مستحکم بنانے میں کلیدی کردار ادا کرتی ہے۔
سفیر پاکستان نے نئے پاکستانی تاجروں اور کاروباری افراد کی رہنمائی میں فعال کردار ادا کرے، بالخصوص متحدہ عرب امارات کے ریگولیٹری فریم ورک، قانونی و تعمیلی تقاضوں (کمپلائنس) اور بدلتے ہوئے مارکیٹ کے رجحانات کے بارے میں آگاہی فراہم کرنے کی اہمیت کو اُجاگر کیا۔
اس موقع پر محمد شبیر مرچنٹ نے سفیر پاکستان کو پاکستان بزنس کونسل کی جانب سے پاکستانی کاروباری برادری کی فلاح و بہبود کے لیے کیے جانے والے مختلف اقدامات سے آگاہ کیا، جن میں وکالت، نیٹ ورکنگ اور استعداد سازی (کپیسیٹی بلڈنگ) کی سرگرمیاں شامل ہیں، جن کا مقصد متحدہ عرب امارات میں پاکستانی کاروباروں کے اثر و رسوخ کو مزید مضبوط بنانا ہے۔