بی آر ٹی پشاور کے لیے خریدی گئی تمام 52 نئی بسوں کی ترسیل مکمل ہوگئی، مزید 27 بسیں آج صبح چمکنی ڈپو پہنچ گئیں۔
ٹرانس پشاور کے مطابق گزشتہ ماہ 25 نئی بسیں پشاور پہنچائی گئی تھیں، جبکہ آج مزید 27 بسوں کی آمد کے بعد تمام نئی بسوں کی ترسیل کا عمل مکمل ہوگیا ہے۔
ٹرانس پشاور کا کہنا ہے کہ نئی بسوں کی شمولیت سے بی آر ٹی پشاور میں مسافروں کو مزید بہتر سفری سہولیات فراہم کرنے میں مدد ملے گی۔ بسوں کی تعداد بڑھنے سے موجودہ سروس کو بہتر بنانے اور نئے روٹس شروع کرنے کے امکانات بھی بڑھیں گے۔ نئی بسوں کی آمد کے بعد بی آر ٹی پشاور کے بیڑے میں بسوں کی مجموعی تعداد 296 ہوگئی ہے۔
ٹرانس پشاور نے سوشل میڈیا پر نئی بسوں کی نقل و حمل سے متعلق گردش کرنے والی ویڈیوز کو گمراہ کن انداز میں پیش کیے جانے کی وضاحت کرتے ہوئے کہا ہے کہ نئی بسیں پشاور سے باہر نہیں لے جائی جا رہی تھیں بلکہ انہیں پشاور لایا جا رہا تھا۔
ادارے کے مطابق تمام 52 نئی بسوں کی پشاور آمد سے سوشل میڈیا پر پھیلائے جانے والے گمراہ کن دعوؤں کی حقیقت واضح ہوگئی ہے۔