بالی وڈ اداکارہ یامی گوتم نے فلم ’دھرندھر: دی ریوینج‘ میں اپنے مختصر کردار کے معاوضے سے متعلق قیاس آرائیوں پر وضاحت کردی ہے۔ اداکارہ کا کہنا ہے کہ اس فلم میں اپنے شوہر اور ہدایت کار آدتیہ دھر کی ہدایت کاری میں کام کرنے کا موقع ان کے لیے کسی بھی رقم سے زیادہ قیمتی تھا۔
یامی نے اس بارے میں گفتگو اپنی نئی فلم ’نئی نویلی‘ کی تشہیر کے دوران مراٹھی کوئز شو ’کون ہو نار کروڑپتی‘ میں کی، جس کی میزبانی مادھوری ڈکشٹ کررہی ہیں۔ سونی لِو کے آفیشل انسٹاگرام اکاؤنٹ پر شیئر کی گئی تشہیری ویڈیو میں مادھوری نے ’دھرندھر: دی ریوینج‘ کی تعریف کرنے کے بعد یامی سے پوچھا کہ کیا انہیں فلم میں خصوصی شرکت کے لیے بھاری معاوضہ دیا گیا تھا یا انہوں نے اپنے شوہر کی درخواست پر کردار ادا کیا۔
یامی گوتم نے جواب دیا کہ انہوں نے کہیں پڑھا تھا کہ انہیں اس مختصر کردار کے لیے بہت بڑی رقم کا چیک ملا ہے، جس پر وہ حیران رہ گئی تھیں۔ ان کے مطابق، کچھ چیزوں کی قیمت نہیں لگائی جاسکتی۔
اداکارہ نے بتایا کہ آدتیہ دھر نے ان سے فلم میں خصوصی طور پر آنے کی درخواست کی تھی تاکہ وہ ان کے لیے خوش بختی کا باعث بنیں اور اپنے مختصر کردار سے اسکرین پر نمایاں تاثر چھوڑیں۔ یامی کے بقول، ایک بہترین ہدایت کار کی ہدایت میں کام کرنا ہی ان کے لیے اصل معاوضہ تھا۔
مادھوری ڈکشٹ نے بھی فلم میں یامی کی اچانک آمد کا ذکر کیا اور کہا کہ ان کا کردار خاص طور پر اس لمحے یادگار بن گیا جب اداکارہ مڑتی ہیں اور ناظرین کے سامنے ان کی شناخت ظاہر ہوتی ہے۔
آدتیہ دھر کی ہدایت کاری میں بننے والی ’دھرندھر: دی ریوینج‘، 2025 کی ایکشن تھرلر فلم ’دھرندھر‘ کی کہانی کو آگے بڑھاتی ہے۔ فلم میں رنویر سنگھ مرکزی کردار ادا کررہے ہیں، جبکہ ارجن رامپال، راکیش بیدی، دانش پاندور، سنجے دت اور سارہ ارجن بھی اہم کرداروں میں شامل ہیں۔ فلم نے 2026 میں باکس آفس پر نمایاں کامیابی حاصل کرکے خاصی توجہ حاصل کی۔
دوسری جانب یامی گوتم کی نئی فلم ’نئی نویلی‘ 16 اکتوبر کو سینما گھروں میں ریلیز ہوئی۔ اس فلم میں ادیناتھ کوٹھارے، میتا واششت، سونل جھا اور سنیتا راجور بھی اہم کردار ادا کررہے ہیں۔