خاتون صحافی ابو عاقلہ کے قتل پر الجزیرہ نے جرائم کی عالمی عدالت کا دروازہ کھٹکھٹانے کا فیصلہ کرلیا ہے۔
غیر ملکی خبر رساں ادارے کی ایک رپورٹ کے مطابق ادارے نے اسرائیلی فوج کی فائرنگ سے جاں بحق ہونے والی خاتون صحافی شیریں ابو عاقلہ کے کیس پر اپنی قانونی ٹیم کو جرائم کی عالمی عدالت سے رجوع کرنے کی ہدایت کی ہے۔
الجزیرہ کی جانب سے جاری کردہ ایک بیان میں کہا گیا ہے کہ ادارے نے اس سلسلے میں عالمی ماہرین کے ساتھ قانونی ٹیم رکھنے والے ایک بین الاقوامی اتحاد کو بھی آگاہ کردیا ہے جو خاتون صحافی کے قتل کے معاملے پر عالمی عدالت میں جمع کرانے کے لیے ایک ڈوزیئر تیار کررہے ہیں۔مئی 2021 میں غزہ میں الجزیرہ کے دفتر پر اسرائیلی بمباری اور اس کے نتیجے میں دفتر کی مکمل تباہی کو بھی عالمی عدالت میں اٹھایا جائے گا۔
الجزیرہ کی جانب سے جاری بیان میں مزید کہا گیا ہےکہ وار زون یا مقبوضہ علاقے میں کام کرنے والے صحافی کا قتل یا اس پر حملہ جرائم کی عالمی عدالت کے چارٹر کے آرٹیکل 8 کے تحت جنگی جرم ہے۔
واضح رہے کہ الجزیرہ کی ممتاز خاتون صحافی ابو شیریں عاقلہ کو اسرائیلی فوج نے 11 مئی کو مقبوضہ مغربی کنارے کے پاس فائرنگ کا نشانہ بنایا تھا۔ اس قبل متعدد دفعہ اسرائیلی فورسز پیرامیڈکس، میڈیا پرسنز کو نشانہ بناچکی ہیں تاہم، اسرائیلی فورسز کے اہلکاروں کے خلاف کسی بھی قسم کی کارروائی عمل میں نہیں لائی گئی ہے
Advertisement