جنوبی امریکا کے ملک کولمبیا میں بُل فائنٹنگ کے ایک مقابلے کے دوران شائقین سے کھچا کھچ بھرے اسٹیڈیم میں لکڑی کے ایک بڑے اسٹینڈ کے گرنے سے چار افراد ہلاک اور تین سو زائد زخمی ہو گئے ہیں۔
فرانسیسی خبر رساں ادارے اے ایف پی کے مطابق گزشتہ روز ایل ایسپنل شہر میں ہونے والے اس حادثے کے بعد ٹولیما کے گورنر نے مقامی ریڈیو کو بتایا کہ چار افراد کی فوری طور پر موت واقع ہو گئی جن میں دو خواتین، ایک مرد اور ایک بچہ شامل ہے۔
سوشل میڈیا پر سامنے آنے والی مختلف وڈیو میں دیکھا جا سکتا ہے کہ تین منزلہ لکڑی کا اسٹینڈ جو شائقین سے بھرا ہوا تھا اچانک زمیں بوس ہو گیا اور درجنوں افراد زمین پر آ گرے۔ ایک اور وڈیو میں نظر آتا ہے کہ لوگ اسٹینڈ سے بھاگنے کی کوشش کر رہے ہیں جبکہ ایک بیل میدان میں گھوم رہا ہے۔
Advertisement
ٹولیما کی سیکرٹری صحت کے مطابق علاقے میں موجود ہسپتالوں میں 322 زخمی افراد کو طبی امداد فراہم کی گئی ہے جن میں سے چار کی حالت تشویش ناک ہے۔ یہ ایونٹ سان پیڈرو فیسٹول کی تقریبات کا حصہ تھا جو خطے میں بہت مقبول ہے۔
کولمبیا کے سبکدوش ہونے والے صدر ایوان ڈیوک نے ٹوئٹر پر کہا کہ وہ حقائق جاننے کے لیے حادثے کی تحقیقات کی درخواست کریں گے۔ انہوں نے ہلاک اور زخمی ہونے والے افراد کے لواحقین سے اظہار افسوس بھی کیا ہے۔