امریکی شہر ڈیلاس کے پولیس حکام نے پیر کے روز لو فیلڈ ایئرپورٹ کی عمارت میں ہوائی فائرنگ کرنے والی خاتون کی وڈیو جاری کی ہے۔ ڈیوٹی پر موجود ایک پولیس اہلکار نے کسی جانی نقصان کے خدشے کے پیش نظر خاتون کو گولی مار کر زخمی کر دیا تھا۔
امریکی خبر رساں ادارے ایسوسی ایٹڈ پریس کے مطابق ڈیلاس کے پولیس چیف ایڈی گارشیا نے ایک نیوز کانفرنس میں بتایا کہ 37 سالہ حملہ آور خاتون جس کی شناخت پورشیا اوڈوفوا کے نام سے ہوئی ہے، صبح 11 بجے کے قریب ایک نجی ٹیکسی سروس کے ذریعے ایئر پورٹ پہنچی تھی۔
ایئرپورٹ پر نصب سی سی ٹی وی کیمروں کی وڈیوز میں دیکھا جا سکتا ہے کہ حملہ آور خاتون ٹکٹنگ کاؤنٹر کے قریب واقع واش روم میں داخل ہوئی جہاں سے وہ ہُڈی پہن کر باہر نکلی اور آرام سے چلتے ہوئے ایئرپورٹ لاؤنج میں بنے کیوسک ایریا تک گئی۔ وہاں پہنچ کر خاتون نے پستول نکالی اور چھت کی طرف رُخ کرکے کئی گولیاں چلائیں جس کے بعد وہاں افراتفری مچ گئی۔
Advertisement
ڈیلس پولیس چیف ایڈی گارشیا کے مطابق قریب ہی موجود رونلڈ کرونن نامی ایک پولیس اہلکار نے خاتون کے جسم کے نچلے حصے پر گولی مار کر اسے زخمی کر دیا جس کے بعد اسے حراست میں لے لیا گیا۔ زخمی خاتون کو علاج کے لیے مقامی اسپتال لے جایا گیا جہاں اُس کا آپریشن کیا گیا ہے۔ پولیس چیف ایڈی گارشیا کا کہنا تھا کہ اس واقعے میں حملہ آور خاتون کے علاوہ کوئی اور شخص زخمی نہیں ہوا تاہم یہ نہیں بتایا کہ انہوں نے فائرنگ کیوں کی تھی۔
پولیس چیف نے مزید کہا کہ عینی شاہدین کے مطابق خاتون نے فائرنگ کرنے سے پہلے اپنی ازدواجی مشکلات اور شوہر کی دھوکا دہی کا ذکر کیا تھا۔ زخمی خاتون کا دعویٰ ہے کہ وہ معروف گلوکار کرس براؤن کی بیوی ہے اور اُس نے شوہر کی دھوکے بازی کی وجہ سے پریشان ہو کر یہ اقدام اٹھایا تھا۔ ریکارڈ کے مطابق خاتون 2016ء سے پستول خریدنے کی کوشش کر رہی تھی۔
Advertisement