جنوبی افریقا میں ہونے والے ٹینٹ پیگنگ ورلڈ کپ میں پاکستان نے شاندار کارکردگی کا مظاہرہ کرتے ہوئے تیسرے روز ٹیم اور انفرادی مقابلوں میں گولڈ میڈل حاصل کئے جبکہ مجموعی ورلڈ چیمپئن شپ میں پاکستان نے دوسری پوزیشن حاصل کرکے سلور میڈل جیتا۔
پاکستان کے عرفان محمود نے مجموعی چیمپئن شپ کا سلور میڈل اپنے نام کیا۔
جنوبی افریقی شہر جارج میں ہونے والے ٹینٹ پیگنگ ورلڈ کپ کے تیسرے روز رنگ اینڈ پیگ، لیمن اینڈ پیگ اور لانس و سلور کی ریلے ہوئیں اور ہر کیٹیگری میں شاندار کارکردگی کا مظاہرہ کرتے ہوئے 294 پوائنٹس کے ساتھ دن کا گولڈ میڈل جیتا۔
سعودی عرب نے 289 پوائنٹس کے ساتھ دوسری اور انڈیا نے 276.5 پوائنٹس کے ساتھ تیسری پوزیشن حاصل کی ۔
رنگ اینڈ پیگ کے رن میں پاکستان کے تصور عباس اور وجاہت اللہ نے مہارت کا مظاہرہ کرکے مکمل پوائنٹس حاصل کئے ۔
لیمن اینڈ پیگ میں تصور عباس نے مکمل پوائنٹس حاصل کئے۔
لانس ریلے میں پاکستان کے وجاہت اللّٰہ کا نشانہ چک گیا لیکن سوورڈ کے ریلے میں پاکستان کے چاروں رائیڈرز نے خوبصورتی سے تلوار سے ہدف کو نشانہ لیا اور اسے لائن کے پار لگاکر پورے پوائنٹس حاصل کئے۔
پاکستانی رائیڈر تصور عباس سے تیسرے روز ایک بھی ہدف نہیں چُکا، انہوں نے مہارت سے نیزے اور تلوار کا استعمال کرتے ہوئے پورے 84 پوائنٹس حاصل کئے اور انفرادی گولڈ میڈل جیتا۔
مجموعی چیمپئن شپ میں پاکستان 570 پوائنٹس کے ساتھ دوسری پوزیشن پر رہا، سعودی عرب نے 581.5 پوائنٹس کے ساتھ پہلی پوزیشن حاصل کی جبکہ بھارت 548.5 پوائنٹس لے کر تیسرے نمبر پر رہا۔
مجموعی چیمپئن شپ کے انفرادی رائیڈرز میں پاکستان کے عرفان محمود نے سلور میڈل حاصل کیا۔ انہوں نے تین دن جاری رہنے والے ورلڈ کپ میں 152 پوائنٹس حاصل کیے۔ سعودی عرب کے حسن عمر چار پوائنٹس کی برتری کی وجہ سے بہترین رائیڈر اور گولڈ میڈل کے حقدار ہوگئے۔