شہزادی ڈیانا کی زندگی پر ایک خفیہ فلمی منصوبے کی تیاری کی اطلاعات سامنے آئی ہیں، جس میں ڈیوک آف سسیکس شہزادہ ہیری کی اہلیہ میگھن مارکل کو بھی اہم کردار دینے پر غور کیا جا رہا ہے۔
غیر ملکی میڈیا رپورٹس کے مطابق اس منصوبے میں میگھن کی شمولیت محض مختصر اداکاری تک محدود نہیں ہوگی بلکہ انہیں ڈیانا کی کہانی بیان کرنے کی ذمے داری دیے جانے کا امکان ہے۔
رپورٹس کے مطابق شہزادہ ہیری گزشتہ ماہ اہلیہ میگھن مارکل اور اپنے بچوں شہزادہ آرچی اور شہزادی للی بیٹ کے ہمراہ طویل قیام کے لیے برطانیہ واپس آئے تھے۔ اسی دوران ان کی جانب سے والدہ شہزادی ڈیانا کی زندگی پر مبنی اس مبینہ پروجیکٹ پر کام شروع کیے جانے کی خبریں سامنے آئی ہیں۔
میڈیا رپورٹس میں دعویٰ کیا گیا ہے کہ شہزادہ ہیری اس منصوبے میں میگھن کو شامل کرنے کے خواہش مند ہیں اور چاہتے ہیں کہ وہ فلم میں ڈیانا کی زندگی کی راوی کے طور پر سامنے آئیں۔ اس صورت میں میگھن صرف ایک معمولی یا مختصر کردار ادا نہیں کریں گی بلکہ کہانی کو آگے بڑھانے میں ان کی آواز بنیادی حیثیت رکھے گی۔
رپورٹس کے مطابق شہزادہ ہیری خود بھی فلم میں اپنی والدہ کے بیٹے کی حیثیت سے دکھائی دے سکتے ہیں، تاہم ڈیانا کی زندگی اور ان کی کہانی ناظرین تک میگھن مارکل کی آواز کے ذریعے پہنچنے کا امکان ہے۔ اس طرح میگھن کا کردار اس مبینہ فلم کے اہم ترین حصوں میں شمار ہوسکتا ہے۔
واضح رہے کہ شہزادی ڈیانا 1997 میں پیرس میں پیش آنے والے ایک کار حادثے میں ہلاک ہوئی تھیں۔ ان کی زندگی، شاہی خاندان سے تعلق، ازدواجی زندگی اور غیر معمولی عوامی مقبولیت آج بھی دنیا بھر میں دلچسپی کا موضوع ہے۔