ایرانی فلم ساز مجید مجیدی کی ڈرامہ فلم ’مڈ ڈے میل‘ نے جنوبی کوریا میں منعقد ہونے والے بوسان انٹرنیشنل فلم فیسٹیول کا سب سے بڑا ایوارڈ جیت لیا ہے۔ اس کامیابی کے ساتھ فلم نے آسکر ایوارڈز کی بین الاقوامی فیچر فلم کیٹیگری کے لیے براہِ راست اہلیت بھی حاصل کرلی ہے۔
غیر ملکی میڈیا رپورٹس کے مطابق، ایشیا کے بڑے فلمی میلوں میں شمار ہونے والے بوسان انٹرنیشنل فلم فیسٹیول میں اس سال مرکزی مقابلے کے لیے 13 فلمیں منتخب کی گئی تھیں، جن میں میزبان ملک جنوبی کوریا کی تین فلمیں بھی شامل تھیں۔ فیسٹیول نے گزشتہ سال پہلی مرتبہ باقاعدہ مسابقتی مقابلے کا آغاز کیا تھا، جبکہ رواں برس ایرانی فلم نے سب کو پیچھے چھوڑ دیا۔
فاتح فلم کا انتخاب معروف چینی ہدایت کار ژانگ ییمو کی سربراہی میں قائم جیوری نے کیا۔ ژانگ ییمو ’رائز دی ریڈ لالٹین‘ جیسی فلموں کے باعث عالمی سطح پر شہرت رکھتے ہیں۔
’مڈ ڈے میل‘ کی کہانی ایران کے ایک غریب گاؤں میں تعینات استاد کے گرد گھومتی ہے۔ حالات اسے اس نہج پر لے آتے ہیں کہ وہ اپنے اسکول کو بند ہونے سے بچانے کے لیے اسمگلنگ کا راستہ اختیار کرنے پر مجبور ہوجاتا ہے۔ فلم میں ایک استاد کی مجبوریوں اور اپنے تعلیمی ادارے کو بچانے کی جدوجہد کو موضوع بنایا گیا ہے۔
بوسان فلم فیسٹیول کا یہ اعزاز مجید مجیدی کی فلم کے لیے اہم کامیابی ہے، جبکہ آسکر کی بین الاقوامی فیچر فلم کیٹیگری میں اہلیت اسے عالمی سطح پر مزید توجہ دلانے کا باعث بن سکتی ہے۔