Hardik Pandya defeated MrBeast in a baseball challenge and won $100,000.

بھارتی آل راؤنڈر ہاردک پانڈیا نے معروف یوٹیوبر مسٹر بیسٹ کے بیس بال چیلنج میں کامیابی حاصل کرکے ایک لاکھ امریکی ڈالر (تقریباً 94.9 لاکھ بھارتی روپے) جیت لیے، تاہم انہوں نے انعامی رقم فلاحی کاموں کے لیے عطیہ کرنے کا فیصلہ کیا ہے۔

بھارتی میڈیا کے مطابق ہاردک پانڈیا مسٹر بیسٹ کی ایک ویڈیو میں کھیلوں کی دیگر معروف شخصیات کے ساتھ بیس بال چیلنج میں شریک ہوئے۔ مقابلے میں حریف سے زیادہ ہوم رنز لگانے تھے، جس میں بھارتی کرکٹر نے کامیابی حاصل کی۔

ہاردک پانڈیا نے جیتی گئی رقم ضرورت مند کتوں اور پسماندہ بچوں کی فلاح و بہبود کے لیے کام کرنے والے اداروں کو عطیہ کرنے کا فیصلہ کیا ہے۔

واضح رہے کہ پانڈیا اس وقت بھارتی ٹیم سے باہر ہیں۔ انہوں نے آخری بار ٹی ٹوئنٹی ورلڈ کپ کے فائنل میں بھارت کی نمائندگی کی تھی، جس کے بعد وہ صرف انڈین پریمیئر لیگ (آئی پی ایل) میں کھیلتے دکھائی دیے ہیں۔