برسلز میں ’پاکستان زندہ باد اور پاک آرمی زندہ باد‘ کار ریلی کا اہتمام
پشتون آرگنائزیشن یورپ اور ای یو پاک فرینڈ شپ فیڈریشن یورپ کی جانب سے برسلز میں ’پاکستان زندہ باد اور پاک آرمی زندہ باد‘ کار ریلی کا اہتمام کیا گیا۔
پشتون آرگنائزیشن یورپ اور ای یو پاک فرینڈ شپ فیڈریشن یورپ نے کار ریلی کا انعقاد کیا جو کہ یورپی یونین کے دارالحکومت برسلز کے معروف سیاحتی مقام آٹو میم پر نکالی گئی۔
ریلی کی قیادت چیئرمین ای یو پاک فرینڈ شپ فیڈریشن یورپ چوہدری پرویز اقبال لوسر نے کی جبکہ کار ریلی میں برسلز میں مقیم پشتون، یونیورسٹی اور کالجز کے طالب علموں سمیت ہر مکتبِ فکر کے افراد نے شرکت کی۔
اس موقع پر چوہدری پرویز اقبال لوسر نے اپنے خطاب میں کہا کہ پاکستان کی سلامتی کے لئے جان بھی حاضر ہے اور پاکستان رہتی دنیا تک قائم ودائم رہے گا۔
ان کا کہنا تھا کہ پاک فوج ناصرف پاکستان کی سلامتی کی ضامن ہے بلکہ اسلام کی بقاء کے لئے بھی اپنی جانوں کا نذرانہ پیش کرتی ہے۔
Advertisement
انہوں نے کہا کہ جب تک پاک فوج ہے پاکستان کی جانب کوئی بھی میلی آنکھ سے نہیں دیکھ سکتا کیونکہ اس کے بہادر سپوت اور اس سے محبت کرنے والے کسی قربانی سے دریغ نہیں کرتے۔