ویرات کوہلی پاکستانی کھلاڑیوں کی شائستہ فطرت کے دیوانے

By admin On ستمبر 5, 2022

بھارت کے سابق کپتان ویرات کوہلی کا کہنا ہے کہ دونوں ملکوں کے کھلاڑیوں کے درمیان میدان میں شدید دشمنی کے باوجود کافی حد تک احترام بھی موجود ہے۔

ٹی ٹوئنٹی ایشیاکپ 2020 کے سپر فور مرحلے میں پاک بھارت مقابلے کے بعد بھارت کے سابق ویرات کوہلی نے پریس کانفرنس کی جس میں انہوں نے پاکستانی کھلاڑیوں کی بھی تعریف کی۔

پریس کانفرنس کے دوران ویرات کوہلی سے بابر اعظم سے موازنے کے بارے میں سوال پوچھا گیا جس پر سابق بھارتی کپتان نے پاکستانی کپتان بابر اعظم کی تعریف کی۔

ان کا کہنا تھا کہ ہمارے درمیان ہمیشہ سے احترام کا رشتہ ہے، انہوں نے بابر اعظم کی تعریف کرتے ہوئے کہا کہ ’بابر بہت آدمی ہیں اور میری ہمیشہ ان سے اچھی بات چیت رہی ہے اور میں ان کا احترام کرتا ہوں‘۔

ویرات کوہلی نے ایک واقعہ یاد کرتے ہوئے کہا کہ ’2019 میں ہونے والے آئی سی سی مینز ورلڈ میں بابر اعظم نے مجھ سے مشورے کے لیے رابطہ کیا تھا اور وہ ہمیشہ سیکھنے کے خواہشمند رہتے ہیں‘۔

انہوں نے کہا کہ 2019 میں پاک بھارت میچ کے بعد انہوں نے مجھ سے بات کی اور اس میں کوئی حیرانی نہیں ہے کہ وہ سیکھنا چاہتے ہیں جو ان کے کھیل میں بھی نظر آتا ہے۔

واضح رہے کہ ایشیاکپ کے دوران دونوں ملکوں کے کھلاڑیوں میں کافی دوستی نظر آئی جب کہ کھلاڑیوں نے دوستانہ ماحول میں بات چیت بھی کی۔

اس حوالے ویرات کوہلی کا کہنا تھا کہ دونوں ملکوں کے کھلاڑیوں کے درمیان باہمی احترام کا رشتہ ہے جو پاکستانی کھلاڑیوں کی شائستہ فطرت سے پیدا ہوتا ہے۔

ویرات کوہلی نے کہا کہ بابر اعظم اور پاکستان کے دوسرے کھلاڑیوں سے مل کر ہمیشہ اچھا لگا ہے، وہ سب دوستانہ ہیں اور ہم سب سے اچھے طریقے سے ملتے ہیں۔

یاد رہے کہ ٹی ٹوئنٹی ایشیاکپ سپر فور مرحلے میں اتوار کو ہونے والے پاک بھارت میں پاکستان نے بھارت کو سنسنی خیز مقابلے کے بعد 5 وکٹوں سے شکست دی تھی۔

سپر فور مرحلے میں بھارت کا اگلا مقابلہ 6 ستمبر کو سری لنکا کے خلاف ہوگا جس میں بھارت کا جیتنا انتہائی ضروری ہے۔