انٹرنیشنلاہم خبریں

بھارت، صحافی محمد زبیر کو مذہبی منافرت پھیلانے کے الزام میں گرفتار کرلیا گیا

By admin
43
Print Friendly, PDF & Email

بھارتی دارالحکومت نئی دہلی میں پولیس نے خبروں کی حقیقت جانچنے والی فیکٹ چیکنگ ویب سائٹ ’’آلٹ نیوز‘‘ کے شریک بانی اور صحافی محمد زبیر کوگرفتار کر لیا ہے۔

بھارتی میڈیا کے مطابق صحافی محمد زبیر کو مذہبی جذبات کو ٹھیس پہنچانے اور منافرت پھیلانے کے الزام میں گزشتہ روز حراست میں لیا گیا۔ اطلاعات ہیں کہ محمد زبیر پر انڈین پینل کوڈ کی دفعہ 153 اور 295 اے کے تحت مقدمہ درج کیا گیا ہے جو لوگوں کو ہنگامے پر اکسانے اور جان بوجھ کر مذہبی منافرت پھیلانے کے جرم میں لگائی جاتی ہیں۔

ویب سائٹ ’’آلٹ نیوز‘‘ کے شریک بانی پراتیک سنہا کے مطابق محمد زبیر کو اسپیشل سیل نے 2020ء کے ایک کیس میں طلب کیا تھا جس پر ہائی کورٹ انہیں پہلے ہی ضمانت قبل از گرفتاری دے چکی ہے۔ گزشتہ شام سات بجے کے قریب انہیں بتایا گیا کہ محمد زبیر کو ایک اور کیس میں گرفتار کیا گیا ہے اور اس حوالے سے کوئی نوٹس بھی نہیں دیا گیا۔ بار بار درخواست کرنے کے باوجود ایف آئی آر کی کاپی بھی نہیں دی جا رہی۔

ویب سائٹ ’’آلٹ نیوز‘‘ 2017ء میں بنائی گئی تھی اور اس کا شمار دنیا کی معروف ترین فیکٹ چیکنگ ویب سائٹس میں ہوتا ہے۔ اس کے بانی تب سے ہی مختلف انتہاپسند ہندو گروہوں کی دھمکیوں، آن لائن ٹرولنگ اور مقدمات کا سامنا کرتے رہے ہیں۔ سیاسی جماعت کانگریس کے رہنما ششی تھرور نے محمد زبیر کی گرفتاری کو سچ پر حملہ قرار دیتے ہوئے ان کو فوری طور پر رہا کرنے کا مطالبہ کیا ہے۔

واضح رہے کہ محمد زبیر نے پیغمبر اسلام ﷺ کے بارے میں توہین آمیز تبصرہ کرنے والی بی جے پی کی سابق ترجمان نوپور شرما کا وڈیو کلپ ٹوئٹر پر شیئر کرکے اس کی مذمت کی تھی۔ محمد زبیر نے کہا تھا کہ نوپور شرما اور ٹی وی پروگرام کے میزبان نفرت پھیلا رہے ہیں۔

شاید آپ یہ بھی پسند کریں مصنف سے زیادہ
جواب چھوڑیں

آپ کا ای میل ایڈریس شائع نہیں کیا جائے گا.

@media print { body { color: inherit; /* Ensures that the color is maintained */ } }