آئی سی سی ون ڈے ٹیم رینکنگ، بھارت نے پاکستان کو پیچھے چھوڑ دیا
انٹرنیشنل کرکٹ کونسل (آئی سی سی) کی جانب سے ون ڈے کی تازہ ترین رینکنگ جاری کی گئی ہے جس میں بھارت نے پاکستان کو پیچھے چھوڑ دیا ہے۔
منگل کو اوول میں ہونے والے پہلے ون ڈے میچ میں بھارت نے انگلینڈ کو شکست دے کر پاکستان کو رینکنگ میں پچھے دھکیل دیا ہے۔
انگلینڈ کے خلاف 10 وکٹوں سے کامیابی نے بھارت کو ون ڈے رینکنگ میں واپس تیسری پوزیشن دلوادی ہے جبکہ میچ سے قبل بھارت 105 پوائنٹس کے ساتھ چوتھے نمبر پر موجود تھا۔
انگلینڈ کے خلاف پہلے میچ میں جیت کے بعد بھارت کے پوائنٹس ٹیبل پر 108 پوائنٹس ہوگئے ہیں جبکہ پاکستان 106 پوائنٹس کے چوتھے نمبر پر موجود ہے۔
Advertisement
آئی سی سی ون ڈے ٹیم رینکنگ کے مطابق فہرست میں نیوزی لینڈ 126 پوائنٹس کے ساتھ سرفہرست ہے جبکہ انگلینڈ کا 122 پوائنٹس کے ساتھ دوسرا نمبر ہے۔
واضح رہے کہ بھارت نے جسپریت بمراہ کی تباہ کن چھ وکٹوں کی بدولت انگلینڈ کو 110 کے مجموعے اسکور پر ڈھیر کردیا تھا جبکہ محمد شامی نے 3 اور پراسید کرشنا نے ایک وکٹ حاصل کی تھی۔
ہدف کے تعاقب میں بھارت نے کپتان روہت شرما کی ناقابل شکست 78 رنز کی اننگز کے ساتھ 10 وکٹوں سے کامیابی اپنے نام کی تھی۔
بحیثیت کپتان روہت شرما کے جیت کا سلسلہ جاری ہے اور اب تک 4 میچز میں سے بھارت تمام میچز جیتنے میں کامیاب رہا ہے۔
یاد رہے کہ پاکستان نے گذشتہ ماہ ویسٹ انڈیز کو کلین سوئپ کرنے کے بعد بھارت کو رینکنگ میں چوتھے نمبر پر دھکیل دیا تھا تاہم پاکستان ٹیم زیادہ دیر تیسرے نمبر پر نہیں رہ سکی۔