سری لنکا کو دوسرے ٹیسٹ سے قبل بڑا دھچکا
گال: پاکستان کے خلاف دوسرے ٹیسٹ میچ میں سری لنکن اسپنر مہیش تھیک شنا میچ سے باہر ہوگئے ہیں۔
گال میں دوسرے ٹیسٹ میچ سے قبل سری لنکن ٹیم کو بڑا دھچکا لگا ہے کیونکہ ان کی ٹیم کے اہم اسپنر مہیش تھیک شنا دائیں ہاتھ کی انگلی میں چوٹ لگنے کی وجہ سے ٹیم سے باہر ہوگئے ہیں۔
دوسرے ٹیسٹ میں مہیش تھیک شنا کی جگہ ٹیم میں 22 سالہ آف اسپنر لکشیتھا ماناسنگھے کو شامل کیے جانے کا امکان ہے جن کا فرسٹ کلاس کرکٹ میں شاندار ریکارڈ رہا ہے جبکہ یہ میچ ان کا ڈیبیو بھی ہوگا۔
لکشیتھا ماناسنگھے نے فرسٹ کلاس کرکٹ میں 17 میچز کھیلے ہیں جس میں 73 وکٹیں حاصل کی ہیں جبکہ بلے بازی میں بھی وہ 582 رنز اسکور کرچکے ہیں۔
Advertisement
واضح رہے کہ مہیش تھیک شنا نے پہلے ٹیسٹ میچ میں پاکستان کے خلاف پہلی اننگز میں 68 رنز دے کر 2 وکٹیں حاصل کی تھیں جبکہ دوسری اننگز میں وہ 44 رنز دے کر کوئی وکٹ حاصل نہیں کرسکے تھے۔
اس میچ میں پاکستان نے ناقابل یقین ہدف کا تعاقب کرتے ہوئے 4 وکٹوں سے کامیابی اپنے نام کی تھی جبکہ مہمان ٹیم نے 342 رنز کا بڑا ہدف دیا تھا۔
سری لنکن اسپنر اپنے ملک کے لیے اب تک دو ٹیسٹ میچز کھیل چکے ہیں جس میں مجموعی طور پر انہوں نے 5 وکٹیں حاصل کی ہیں۔
خیال رہے کہ یہ سیریز سری لنکا اور پاکستان کے لیے عالمی ٹیسٹ چیمپئن شپ کے اہم پوائنٹس کے لحاظ سے اہمیت کی حامل ہے۔
پہلے ٹیسٹ میں شکست کے بعد سری لنکن ٹیم 48.15 پوائنٹس کے ساتھ رینکنگ میں چھٹے نمبر پر آ گئی ہے جبکہ پاکستان 58.33 پوائنٹس کے ساتھ تیسرے نمبر پر چلا گیا ہے۔