الجزائری نوجوان نے بیک وقت دو شادیاں کرکے سب کو حیران کردیا

By admin On ستمبر 8, 2022

الجزائری نوجوان نے بیک وقت دو شادیاں کرلی ہیں جس کی وجہ سے سوشل میڈیا پر انہیں سخت تنقید کا سامنا کرنا پڑ رہا ہے۔

غیر ملکی خبر رساں ادارے کے مطابق الجزائر کے دارالحکومت سے 140 کلو میٹر دور ’سکیکدۃ‘ شہر سے تعلق رکھنے والے الرشید بودیوۃ نے بیک وقت دو شادیاں کرکے سب کو حیران کردیا ہے۔

رپورٹ کے مطابق الرشید بودیوۃ نے حنان اور مریم نامی دو لڑکیوں سے بیک وقت شادیاں کیں ہیں جب کہ دونوں کی رخصتی بھی ایک ہی وقت میں ہوئی ہے۔

بیک وقت دو شادیاں کرنے پر سوشل میڈیا صارفین نے حیرت اور تعجب کا اظہار کیا ہے جب کہ کئی صارفین نے ان کو تنقید کا بھی نشانہ بنایا ہے۔

رپورٹ میں کہا گیا ہے کہ تنقید کے بعد الرشید بودیوۃ نے سوشل میڈٰیا پر ایک وضاحتی بیان بھی جاری کیا ہے جس میں انہوں نے تنقید کو بلا جواز قرار دیا ہے۔

سوشل میڈٰیا پر جاری بیان میں انہوں نے کہا کہ’میں نے کوئی ناجائز کام نہیں کیا ہے اور نہ ہی میرا مقصد خواتین کو بدنام کرنا یا شہرت حاصل کرنا تھا، میں کسی کے بھی ساتھ برا نہیں چاہتا تھا‘۔

انہوں نے کہا کہ مجھے نہیں پتہ تھا کہ دو لڑکیوں سے بیک وقت شادی اور رخصتی کرنے پر اتنا زیادہ ہنگامہ ہوجائے گا جب کہ میری شادی کی تقریب رشتہ داروں اور احباب کی موجودگی میں ہوئی تھی۔

ان کا کہنا تھا کہ میں کوئی مالدار شخص نہیں ہوں اور نہ ہی میرے پاس اپنا مکان یا پلاٹ ہے، میں بس عام انسان ہوں لیکن دل کا مالدار اور پرعزم انسان ضرور ہوں۔

انہوں نے آخر میں پیار بھرے پیغامات بھیجنے والے صارفین کا بھی خصوصی شکریہ ادا کیا ہے۔