ایشیاکپ فائنل؛ وسیم اکرم نے قومی ٹیم کو خبردار کردیا

By admin On ستمبر 11, 2022

وسیم اکرم نے ایشیاکپ کے فائنل میں پاکستان کو فیورٹ قرار دیتے ہوئے خبردار کردیا ہے۔

پاکستان ٹیم کے لیجنڈ فاسٹ بولر وسیم اکرم نے ایشیاکپ 2022 کے فائنل میں سری لنکا کے خلاف قومی ٹیم کو خبردار کیا ہے۔

پاکستان ٹیم نے سپر فور مرحلے میں بھارت اور افغانستان کو شکست دے کر فائنل تک رسائی حاصل کی ہے تاہم جمعہ کو ہونے والے رسمی میچ میں انہیں سری لنکا سے شکست کا سامنا کرنا پڑا۔

سوئنگ کے سلطان وسیم اکرم کا اسپورٹس چینل سے گفتگو کرتے ہوئے کہنا تھا کہ پاکستان ٹیم کو فائنل میں فیورٹ قرار دیا گیا ہے تاہم انہوں نے قومی ٹیم کو مشورہ دیا ہے کہ وہ سری لنکن ٹیم کو ہلکا نہ لیں۔

وسیم اکرم کہتے ہیں کہ ایشیاکپ میں قومی ٹیم کی کارکردگی شاندار رہی ہے تاہم سری لنکا کے خلاف ان کی بیٹنگ لائن لڑکھڑا گئی تھی اگرچہ بولنگ اچھی رہی تھی۔

سابق کپتان کا کہنا تھا کہ پاکستان فائنل میں فیورٹ ہے لیکن پرجوش اور نوجوان سری لنکن ٹیم کو آسان نہیں لیا جاسکتا۔

وسیم اکرم نے مزید کہا کہ شائقین کرکٹ کہتے رہے ہیں کہ ہمارا مڈل آرڈر ناتجربہ کار ہے جس کا انکشاف گذشتہ میچ میں سری لنکا کے خلاف بھی ہوا تھا، امید ہے کہ فائنل میں یہ اچھی کارکردگی کا مظاہرہ کریں۔

واضح رہے کہ ایشیاکپ سپر فور مرحلے کے رسمی میں سری لنکا کے وینندو ہسرنگا نے پاکستان کے خلاف اپنی ٹیم کو شاندار جیت دلوائی تھی جب کہ انہوں نے 21 رنز دے کر 3 کھلاڑیوں کو آؤٹ کیا تھا۔