ٹیم میں مڈؒل آرڈر پر شعیب ملک ضروری ہیں، مدثر نذر

By admin On اکتوبر 5, 2022

پاکستان کرکٹ ٹیم کے سابق کپتان مدثر نذر نے قومی ٹیم کی خامیوں پر نظر ڈالتے ہوئے شعیب ملک کی ٹیم میں واپسی پر زور دیا ہے۔

نجی خبر رساں ادارے کو انٹرویو دیتے ہوئے سابق کپتان مدثر نذر نے ٹی ٹوئنٹی ورلڈ کپ میں قومی ٹیم کے امکانات اور ثقلین مشتاق کے بطور ہیڈ کوچ دور پر تفصیلی گفتگو کی ہے۔

مدثر نذر نے کہا کہ انگلینڈ کے خلاف پاکستان ٹیم نے اچھا مقابلہ کیا، ایک یا دو کھلاڑیوں کے علاوہ انگلینڈ نے اپنی پوری ٹیم کے ساتھ کھیلا جب کہ ان کا مقابلہ پاکستان کے صرف تین یا چار کھلاڑیوں کے ساتھ ہی تھا۔

انہوں نے پاکستان کے ٹی ٹوئنٹی فارمیٹ میں کھیلنے کے طریقے پر روشنی ڈالتے ہوئے تجربہ کار کھلاڑی شعیب ملک کی ٹیم میں ضرروت پر زور دیا ہے۔

ان کا کہنا تھا کہ پاکستان ٹیم کی مڈؒل آرڈر بنیادی طور پر کمزور رہی ہے جو ٹیم کے لیے پریشانی کا باعث بھی بنا ہے، مڈؒل آرڈر پر آوازیں اٹھتی رہی ہیں جب کہ سلیکٹرز انہیں بلے بازوں کو کھلانے پر بضد ہیں۔

مدثر نذر کہتے ہیں پاکستان ایک ایسے فارمیٹ کے ساتھ کھیل رہا ہے، جہاں بابر اعظم اور محمد رضوان 12،13 اوورز تک بیٹنگ کرتے ہیں جب کہ آخر میں اندھا دھند کھیلنے والے ہدف بنانے میں مدد کرسکتے ہیں لیکن ایسا دیکھنے کو نہیں ملا۔

انہوں نے شعیب ملک کی ضرورت پر روشنی ڈالتے ہوئے کہا کہ ’پاکستان جس طرح کھیلتا ہے اس کو دیکھتے ہوئے شعیب ملک کا وہاں ہونا ضروری ہے کیونکہ وہ اننگز کو آخر تک لے کر جاتے ہیں جب کہ وہ جانتے ہیں کہ آخر تک کیسے بلے بازی کرنی ہے، وہ فرنچائز کرکٹ میں یہ کام کرتے رہے ہیں‘۔

ان کا خیال ہے کہ ’اگر بابر اور رضوان ٹاپ پر اسکور نہ کرسکے تو پاکستان ٹی ٹوئنٹی ورلڈکپ میں کم اسکور پر آؤٹ ہوسکتی ہے جب کہ انہوں نے پاکستان ٹیم کے ورلڈکپ میں ٹاپ فور میں جگہ بنانے کے امکانات کو بھی مسترد کردیا ہے۔

اس حوالے سے ان کا کہنا تھا کہ ’آسٹریلیا میں گیند بہت زیادہ باؤنس ہوتی ہے جب کہ ہر ٹیم اپنی مخالف ٹیم کا بھرپور تجزیہ رکھتی ہے، ٹیموں نے پاکستان کی حالیہ پرفارمنس دیکھی ہے اور سب جانتے ہیں کہ وہ شارٹ گیند کے خلاف جدوجہد کرتے ہیں‘۔

انہوں نے کہا کہ آسٹریلیا میں ہماری ٹیم 150 سے زیادہ اسکور نہیں کرسکتی اور اگر ابتدائی وکٹیں گرگئیں تو ٹیم 70 یا 80 پر ہی ڈھیر ہوجائے گی۔

ثقلین مشتاق کی کوچنگ کے حوالے سے انہوں نے کہا کہ ’پاکستان ٹیم نے ان کی کوچنگ میں ملے جلے نتائج حاصل کیے ہیں جب کہ ٹی ٹوئنٹی ورلڈ کپ ان کے بحیثیت ہیڈ کوچ مستقبل کے لیے اہمیت کا حامل ہوگا‘۔