نینسی پلوسی کے بعد امریکی ایوان نمائندگان کا نیا سربراہ کون ہوگا؟

By admin On نومبر 18, 2022

امریکی ایوان نمائندگان کی اسپیکر نینسی پلوسی نے ری پبلکنز کی جیت کے بعد عہدہ چھوڑنے کا اعلان کیا ہے۔

غیر ملکی خبر رساں ادارے کی رپورٹ کے مطابق جمعرات کو امریکہ کے وسط مدتی انتخابات میں اپوزیشن جماعت ری پبلکن پارٹی نے ایوان نمائندگان میں برتری حاصل کر لی ہے۔

وسط مدتی انتخابات میں ری پبلکنز نے ایوان نمائندگان میں 218 نشستیں حاصل کی ہیں جب کہ حکمران جماعت ڈیموکریٹ پارٹی نے 211 نشستیں جیتی ہیں۔

وہیں دوسری جانب اتوار کو امریکی صدر جو بائیڈن کی ڈیموکریٹ جماعت نے وسط مدتی انتخابات میں برتری کے بعد سینیٹ کا کنٹرول حاصل کیا تھا۔

ری پبلکن کی ایوان نمائندگان میں اکثریت کے بعد کیلیفورنا سے تعلق رکھنے والی امریکہ کی پہلی خاتون اسپیکر نینسی پلوسی نے ایوان نمائندگان میں تقریر کی۔

تقریر کے دوران انہوں نے اعلان کیا ہے کہ وہ ایوان نمائندگان سے ریٹائر نہیں ہوں گی اور سان فرانسکو کی نمائندگی کرتی رہیں گی جب کہ وہ گذشتہ 35 برسوں سے سان فرانسکو کی نمائندگی کرتی آرہی ہیں۔

ان کا کہنا تھا کہ میرے لیے وہ وقت آگیا ہے کہ ایک نئی نسل ڈیموکریٹ کی قیادت کرے جس کا میں دل سے احترام کرتی ہوں اور میں بے حد مشکور ہوں کہ بہت سے رکن یہ ذمہ دار ادا کرنے کے لیے تیار ہیں۔

واضح رہے کہ نینسی پلوسی نے کانگریس میں دو ڈیمو کریٹک صدور کے ادوار میں قانون سازی کے معاملات میں اہم کردار ادا کیا ہے۔

انہوں نے 2007 سے 2011 تک سابق صدر باراک اوباما اور 2019 سے 2022 کے دور میں ایوان نمائندگان کی اسپیکر کے فرائض انجام دیے ہیں۔

رپورٹس کے مطابق ایوان نمائندگان میں نینسی پلوسی کی جگہ ڈیمو کریٹس کے ممکنہ امیدوار نیویارک سے تعلق رکھنے والے حکیم جیفریز ہوں گے جو پہلے سیاہ فام قانون ساز ہوں گے۔

ری پبلکنز کی جانب سے ایوان نمائندگان میں اقلیتی لیڈر کیون میتھارتھی کو اسپیکر کے عہدے کے لیے نامزد کیا گیا ہے جب کہ امریکی ایوان نمائندگان کے سربراہ کا فیصلہ 30 نومبر کو ہوگا۔