عرب کلاسک۔2024 میں پاکستانی بیس بال ٹیم کو بھارت کے خلاف فتح پر پاکستان کے سفیر فیصل نیاز ترمذی کی مبارکباد۔
دبئی(اردوویکلی)::یواے ای میں پاکستان کے سفیر فیصل نیاز ترمذی نے پاکستان کی بیس بال ٹیم کو عرب کلاسک دبئی ۔2024 میں گزشتہ روز بھارت کے خلاف 0-12 سے شاندار کامیابی پر دلی مبارکباد پیش کرتے ہوئے کھلاڑیوں کے مثالی جذبے ، عزم اور ٹیم ورک کے ساتھ ساتھ بیس بال ٹیم کو کامیابیوں کےلئے تیار کرنے میں انتظامیہ کی لگن کو بھی سراہا۔
یہ شاندار میچ بیس بال یونائیٹڈ بال پارک، سیونز، دبئی میں کھیلا گیا ۔ میچ نے پرزور شائقین کو اپنی جانب متوجہ کیا اور بیس بال کے کھیل میں پاکستان کی موجودگی کوبھی اجاگر کیا۔ سفیرپاکستان نے ٹورنامنٹ میں ٹیم کی مسلسل کامیابیوں کےلئے اپنی نیک خواہشات کا اظہار کیا جس سے عالمی سطح پر پاکستان کی نمائندگی کرنے والے کھلاڑیوں کےلئے سفارت خانہ کی حمایت کے عزم کو بھی تقویت ملی ہے
