یواے ای میں مقیم اوورسیز پاکستانیوں کے لیے پنجاب لینڈ ریکارڈ سروسز کا آغاز

یواے ای میں مقیم اوورسیز پاکستانیوں کے لیے پنجاب لینڈ ریکارڈ سروسز کا آغاز۔

اب یواے ای میں ہی پنجاب کے اراضی ریکارڈ تک  رسائی حاصل ہوگی۔۔

پراپرٹی کی خرید وفروخت کے لیئے فردکے حصول کے لیئے اب پاکستان جانے کی ضرورت نہیں ۔

ابوظہبی-یواے ای (نیوزڈیسک)::سفارت خانہ پاکستان ابوظہبی و قونصلیٹ جنرل آف پاکستان دبئی نے متحدہ عرب امارات میں پنجاب لینڈ ریکارڈ سروسز کا آغاز کر دیا ہے، جو بیرونِ ملک مقیم پاکستانیوں کو پنجاب میں زمین اور جائیداد سے متعلق خدمات تک رسائی کی سہولت فراہم کرنے کی جانب ایک اہم قدم ہے۔

یہ خدمات پنجاب لینڈ ریکارڈز اتھارٹی  کے تعاون سے متعارف کرائی گئی ہیں اور اب سفارت خانہ پاکستان ابوظہبی اور قونصلیٹ جنرل آف پاکستان دبئی، دونوں مقامات پر دستیاب ہیں۔

اس اقدام کے آغاز کے بعد دونوں مشنز نے "فرد ” یعنی زمین کی ملکیت کے ریکارڈ کے اجرا کا سلسلہ شروع کر دیا ہے۔ دونوں مشنز کو یہ اعلان کرتے ہوئے خوشی ہے کہ فردات کا اجرا شروع ہو چکا ہے۔

اس اقدام کے ذریعے متحدہ عرب امارات میں مقیم پاکستانی شہریوں کو پاکستان کا سفر کیے بغیر پنجاب میں زمین کے ریکارڈ اور جائیداد سے متعلق اہم خدمات تک رسائی حاصل ہو سکے گی۔ یہ سہولت بیرونِ ملک مقیم پاکستانیوں کو آسان، شفاف اور مؤثر خدمات فراہم کرنے اور ضروری سرکاری سہولیات کو پاکستانی کمیونٹی کے مزید قریب لانے کی جانب ایک اہم پیش رفت ہے۔

متحدہ عرب امارات میں پنجاب لینڈ ریکارڈز اتھارٹی  کی خدمات کا آغاز حکومتِ پاکستان کی جانب سے بیرونِ ملک مقیم پاکستانیوں کے لیے ڈیجیٹل سہولیات کو فروغ دینے اور عوامی خدمات تک رسائی کو مزید بہتر بنانے کی وسیع تر کوششوں کا حصہ ہے۔

وہ پاکستانی شہری جو اس سہولت سے استفادہ کرنا چاہتے ہیں، مزید معلومات کے لیے پاکستانی سفارتخانے اور قونصلیٹ جنرل کے 24/7 ہیلپ لائن نمبرز پر رابطہ کر سکتے ہیں یا دفتری اوقات کے دوران ابوظہبی اور دبئی میں موجود متعلقہ مشنز کا بالمشافہ وزٹ کر سکتے ہیں۔