آسٹریلیا اور جنوبی افریقا کے درمیان سیریز کے فیصلہ کن تیسرے ٹیسٹ کے پہلے روز دلچسپ اتار چڑھاؤ دیکھنے میں آیا جہاں میزبان ٹیم نے شاندار آغاز کے باوجود اپنی پہلی اننگز میں 329 رنز بنائے۔
آسٹریلوی فاسٹ بولر مچل اسٹارک نے چھ وکٹیں حاصل کرکے اپنی ٹیم کی زبردست واپسی میں اہم کردار ادا کیا۔
نیو لینڈز میں کھیلے جانے والے میچ میں آسٹریلوی کپتان پیٹ کمنز نے ٹاس جیت کر پہلے بولنگ کا فیصلہ کیا تاہم جنوبی افریقی اوپنرز ایڈن مارکرام اور مارکس ایکرمین نے جارحانہ بیٹنگ کرتے ہوئے پہلی وکٹ کے لیے 158 رنز جوڑ دیے۔
ایکرمین نے 94 گیندوں پر 95 رنز بنائے جبکہ مارکرم 78 رنز بنا کر آؤٹ ہوئے۔
دونوں بلے باز سنچریاں مکمل نہ کر سکے جس کے بعد جنوبی افریقی بیٹنگ لائن لڑکھڑا گئی اور ٹیم نے چائے کے وقفے کے آس پاس صرف 29 رنز کے عوض پانچ وکٹیں گنوا دیں۔
ڈیوڈ بیڈنگھم نے 50 رنز کی اننگز کھیلی جبکہ مارکو جینسن نے 50 اور ریان رکلٹن نے 45 رنز بنا کر ساتویں وکٹ کے لیے 95 رنز کی شراکت قائم کی۔
نئی گیند ملنے کے بعد اسٹارک نے تباہ کن بولنگ کرتے ہوئے آخری چار میں سے تین وکٹیں حاصل کیں اور مجموعی طور پر 72 رنز دے کر چھ کھلاڑیوں کو پویلین بھیجا۔
نیتھن لائن نے دو وکٹیں حاصل کیں جبکہ کوپر کونولی نے بھی ٹیسٹ کرکٹ میں اپنی پہلی وکٹ حاصل کی۔