۔’’خلیفہ انٹرنیشنل ڈیٹ پام‘‘ ایوارڈ 2025کے لیئے منتخب ہونےپر
سفیرپاکستان فیصل نیازترمذی کی مبارکباد۔
ابوظہبی (اردوویکلی):متحدہ عرب امارات میں پاکستان کے سفیر فیصل نیاز ترمذی نے پاکستانی سائنسدان ڈاکٹر غلام سرور مرخند کو’’با اثر شخصیت‘‘ کی کیٹیگری میں کھجور اور زرعی جدت کےلئے 17ویں’’خلیفہ انٹرنیشنل ‘‘ایوارڈ برائے 2025جیتنے پر دلی مبارکباد پیش کی
۔ 17ویں ایڈیشن کے فاتحین کا اعلان خلیفہ انٹرنیشنل ایوارڈ برائے کھجور و زرعی جدت کے سیکرٹری جنرل ڈاکٹر عبدالوہاب زید نے ابوظہبی کے ایمریٹس پیلس ہوٹل میں منعقدہ ایک پریس کانفرنس کے دوران کیا۔ یو اے ای کے نائب صدر اور نائب وزیر اعظم شیخ منصور بن زایدالنیہان کی سرپرستی اور وزیربرائے رواداری وبقائے باہمی عزت مآب شیخ نہیان بن مبارک آل نہیان کی نگرانی میں یہ ایوارڈ کھجور کی کاشت اور زرعی جدت میں نمایاں شراکت کا اعتراف ہے۔ ایرتھ زید فلانتھروپیز کے زیر اہتمام ایوارڈ میں 28 ممالک کے 187 امیدواروں نے شرکت کی جو اس کی عالمی اہمیت کی غمازی کرتا ہے
سفیرپاکستان فیصل نیازترمذی نے پاکستان اور متحدہ عرب امارات کے درمیان مضبوط دوطرفہ تعلقات پر زور دیتے ہوئے زرعی اختراعات اور بین الاقوامی تعاون کو فروغ دینے میں متحدہ عرب امارات کی قیادت کو سراہا۔ انہوں نے ماحولیاتی تبدیلی، غذائی تحفظ ، اور پائیدار ترقی جیسے عالمی چیلنجوں سے نمٹنے کے لیے ایوارڈ کے ذریعے حوصلہ افزائی کی کوششوں کی تعریف کی اور ڈاکٹر غلام سرور مرخند جیسے سائنسدانوں کی خدمات کو سراہا جو ایک سرسبز مستقبل کی تشکیل میں معاون کردار ادا کر رہے ہیں۔خلیفہ انٹرنیشنل ایوارڈ 2025 کے فاتحین کے اعلان کے لیئے منعقدکی گئی پریس کانفرنس میں پریس قونصلرپاکستان صالح محمد خان بھی موجودتھے
