آبنائے ہرمز میں ایک جہاز میں آگ لگنے کی اطلاع موصول ہوئی ہے، تاہم آگ لگنے کی وجہ اور ممکنہ جانی نقصان کے بارے میں فوری طور پر کوئی تفصیلات سامنے نہیں آئیں۔
خبر رساں ادارے اے ایف پی کے مطابق برطانوی بحری سکیورٹی ایجنسی یو کے میری ٹائم ٹریڈ آپریشنز نے بتایا کہ اسے ایک دوسرے جہاز کے کپتان کی جانب سے آگ لگنے کی اطلاع موصول ہوئی۔ ایجنسی کے مطابق متاثرہ جہاز عمان کے ساحلی علاقے خصب سے تقریباً 9 ناٹیکل میل، یعنی 17 کلومیٹر شمال میں دیکھا گیا۔
یو کے ایم ٹی او نے ابتدائی اطلاع میں یہ واضح نہیں کیا کہ آگ کس وجہ سے لگی، جہاز کو کتنا نقصان پہنچا یا کوئی شخص زخمی یا ہلاک ہوا ہے یا نہیں۔ واقعے کی مزید تفصیلات بھی فوری طور پر جاری نہیں کی گئیں۔
آبنائے ہرمز عالمی تجارت کے لیے ایک اہم بحری گزرگاہ ہے، جہاں سے دنیا کی بڑی مقدار میں خام تیل اور قدرتی گیس کی ترسیل ہوتی ہے۔ اس راستے میں کسی بھی قسم کی رکاوٹ عالمی توانائی کی منڈیوں اور تیل کی سپلائی کو متاثر کر سکتی ہے۔
رپورٹ کے مطابق فروری میں مشرقِ وسطیٰ کی جنگ شروع ہونے کے بعد ایران نے آبنائے ہرمز پر کنٹرول بڑھانے کی کوشش کی ہے۔ ایران ایسے جہازوں کو بھی نشانہ بنا چکا ہے جن پر اس کا الزام ہے کہ وہ اجازت کے بغیر اس گزرگاہ سے گزر رہے تھے۔