چین کی ایک فیکٹری میں پیپر ری سائیکلنگ شریڈر مشین پر کام کرنے والے ایک ملازم نے اپنے ساتھی کو موت کے منہ سے نکال کر اس کی جان بچا لی۔ اس خوفناک واقعے کی وڈیو سوشل میڈیا پر بھی موجود ہے۔
یہ وڈیو فیکٹری میں لگے ایک مانیٹرنگ کیمرے کے باعث محفوظ ہو گئی تھی جس میں ایک فیکٹری ملازم کے موت کے منہ میں جاتے ہوئے بال بال بچ جانے کا منظر واضح ہے۔
وڈیو میں دیکھا جا سکتا ہے کہ دو ملازم کاغذ ری سائیکلنگ شریڈر مشین کے سامنے کام کر رہے ہیں جہاں کاغذ کا ڈھیر لگا ہوا ہے۔ دونوں ملازم کاغذ مشین میں ڈال رہے تھے کہ اس دوران کاغذ کے ڈھیر پر کھڑے ایک ملازم کو مشین نے اچانک کاغذ کے ساتھ ہی کھینچ لیا۔
اس دوران اس کے ساتھی کو بروقت صورتحال کا ادراک ہو گیا جس نے اس کا ہاتھ پکڑ لیا تاہم مشین اتنی طاقتور تھی کہ وہ دونوں ہی اس کے اندر جانے لگے تب ہی بچانے والے ملازم نے عین وقت پر مشین کا پاور بٹن آف کر دیا۔
Advertisement
اس وقت تک شور سن کر ایک اور ملازم بھی بھاگتا ہوا وہاں پہنچا اور اس نے دونوں ملازمین کو مشین سے باہر نکلنے میں مدد دی۔ اس واقعے میں مشین میں آنے والا ورکر معمولی زخمی ہوا۔