یورپی پولیس نے پاکستانیوں سمیت دیگر ممالک کے شہریوں کو اسمگل کرنے والے ایک بڑے نیٹ ورک کے خلاف کریک ڈاؤن کیا ہے جس کے نتیجے میں آٹھ ہائی ویلیو ٹارگٹس کو گرفتار کرلیا گیا ہے۔
غیر ملکی خبر رساں ادارے کے مطابق یورپی پولیس ایجنسی یوروپول کی ویب سائٹ پر فراہم کردہ معلومات کے مطابق متعلقہ نیٹ ورک افغان، پاکستانی اور شام سے تعلق رکھنے والے تقریباً 10 ہزار مہاجرین کو غیرقانونی طریقے سے یورپ لے جا چکا ہے۔ یوروپول کے مطابق انسانی سمگلنگ میں 126 سہولت کاروں کو بھی حراست میں لیا گیا ہے جن میں سے زیادہ تر کو آسٹریا سے گرفتار کیا گیا۔
حراست میں لیے جانے والے افراد میں زیادہ تر کا تعلق شام سے ہے جنہوں نے عالمی سطح پر اپنے تعلقات قائم کیے ہوئے تھے۔مزید تحقیقات سے معلوم ہوا ہے کہ ان افراد نے کم از کم 10 ہزار مہاجرین کو یورپ اسمگل کرنے میں سہولت فراہم کی ہے۔
واضح رہے، اسمگل شدہ مہاجرین میں سے زیادہ تر کا تعلق افغانستان، پاکستان اور شام سے ہے۔
یوروپول کی جانب سے جاری کردہ بیان میں کہا گیا ہے کہ گزشتہ سال 916 انسانی سمگلنگ کے واقعات سامنے آئے تھے، جبکہ 151 گھروں میں چھاپے مار کے 10 لاکھ یورو قبضے میں لیے گئے۔انسانی سمگلرز نے کارگو لاریز، وینز اور ذاتی گاڑیاں استعمال کرتے ہوئے مہاجرین کو ترکی سے بذریعہ مغربی بلقان ریاستوں، رومانیہ اور ہنگری سے آسٹریا، جرمنی اور نیدرلینڈز پہنچایا گیا۔
Advertisement
یاد رہے، یورپی پولیس کا کہنا ہے کہ وہ مزید چھ ہائی ویلیو ٹارگٹس کا سراغ لگانے کی کوشش کر رہے ہیں۔انسانی سمگلرز کے خلاف آپریشن گزشتہ سال اگست میں لانچ کیا گیا تھا۔