دورہ ویسٹ انڈیز کے میں شکست پر بنگلہ دیش کے کپتان تمیم اقبال نے ٹیم کے کھلاڑیوں کی ناقص کارکردگی پر مایوسی کا اظہار کیا۔
تفصیلات کے مطابق بنگلہ دیش کی ون ڈے ٹیم کے کپتان تمیم اقبال نے ٹائیگرز کی ناقص کارکردگی کا برملا اعتراف کرتے ہوئے کہا کہ ہم اپنی بہترین کرکٹ نہیں کھیل سکے۔
واضح رہے کہ تمیم اقبال نے دورہ ویسٹ انڈیز میں ٹیسٹ سیریز میں مایوس کن کارکردگی کے بعد ٹی ٹوئنٹی سیریز میں اپنے ٹائیگرز سے امید لگا رکھی تھی، لیکن اس میں بھی منہ کی کھانی پڑی۔
ویسٹ انڈیز اور بنگلہ دیش کے درمیان پہلا ون ڈے 10 جولائی کو گیانا میں کھیلا جائے گا۔
یاد رہے کہ دورہ ویسٹ انڈیز میں بنگال ٹائیگرز اب تک ایک بھی کامیاب شکار کرنے میں کامیاب نہیں ہو سکا ہے اور بنگلہ دیش کو ٹیسٹ اور ٹی ٹوئنٹی سیریز میں مکمل وائٹ واش کی ہزیمت اٹھانا پڑی ہے۔
تمیم اقبال نے اپنے ایک بیان میں کہا کہ ہم سب جانتے ہیں کہ شکست کوئی مزے دار چیز نہیں ہے، اور ہم یقینی طور پر اس دورے کو بلندی پر ختم کرنا چاہتے ہیں۔
Advertisement
کپتان تمیم نے اس بات کا اعتراف کیا کہ جب آپ سیریز کے دوران کوئی بھی میچ جیت نہیں پاتے ہو تو یہ ہمیشہ ایک مشکل مرحلہ ہوتا ہے۔
تمیم اقبال نے برملا اس بات کا اعتراف کیا کہ اب تک ہم ٹیسٹ اور ٹی ٹوئنٹی میں اچھی کرکٹ نہیں کھیل سکے، لیکن امید ہے کہ ہم ون ڈے سیریز میں اچھی شروعات کریں گے۔
تمیم اقبال نے ٹیم کی کارکردگی پر مایوسی کا اظہار کرتے ہوئے کہا کہ یہ سچ ہے کہ ہم اپنی بہترین کرکٹ نہیں کھیل سکے۔
تمیم اقبال نے اپنی ٹیم کے کھلاڑیوں کو مخاطب کرتے ہوئے کہا کہ ون ڈے میں ہمیں اپنی پوری کوشش کرنا ہو گی۔
تمیم نے اپنی مایوسی کا اظہار بھی کیا کہ ٹیم کی پریکٹس میں بارش کی وجہ سے تاخیر ہو رہی ہے، اور یہ کہ ٹیم کو ذہنی طور پر تیاری کے لیے کافی وقت نہیں ملا۔