پاکستان کرکٹ ٹیم شیڈول کے مطابق گال روانہ
سری لنکا میں کشیدہ حالات کے باوجود پاکستان کرکٹ ٹیم شیڈول کے مطابق گال روانہ ہو رہی ہے۔
پاکستان ٹیم مقامی وقت کے مطابق 11 بجے کولمبو سے گال روانہ ہوگی جس کی دو گھنٹے کی مسافت کے بعد گال پہنچے گی۔
واضح رہے کہ سری لنکا میں جاری سیاسی اور اقتصادی بحران کی وجہ سے یہ خدشہ ظاہر کیا جا رہا تھا کہ دورہ خطرے میں پڑ سکتا ہے۔
تاہم پاکستان کرکٹ بورڈ نے تمام تر حالات کے باجود دورہ جاری رکھنے کا فیصلہ کیا تھا، ان کا کہنا تھا کہ پاکستان اور سری لنکا کے درمیان دو میچوں کی ٹیسٹ سیریز شیڈول کے مطابق ہی کھیلی جائے گی۔
Advertisement
پاکستان کرکٹ بورڈ کی جانب سے جاری بیان میں کہا گیا تھا کہ سری لنکا میں موجود پاکستان ہائی کمیشن سے بدلتی ہوئی صورت حال پر اپ ڈیٹ لے رہے ہیں۔
ترجمان پی سی بی کا کہنا تھا کہ سری لنکا کرکٹ کے ساتھ بھی مسلسل رابطہ میں ہیں جبکہ سری لنکن کرکٹ نے پاکستان کو فول پروف سیکیورٹی فراہم کرنے کی یقین دہانی کروائی ہے۔
پی سی بی ترجمان کا مزید کہنا ہے کہ قومی ٹیم کو ہوٹل کے ساتھ مال تک جانے کی اجازت ہوتی ہے۔ باہر جانے کے لیے سیکیورٹی کو قبل از وقت آگاہ کرنا ہوتا ہے۔
یاد رہے کہ پاکستان اور سری لنکا کے درمیان پہلا ٹیسٹ میچ 16 جولائی سے گال میں کھیلا جائے گا جبکہ دوسرا ٹیسٹ میچ 24 سے 28 جولائی کے درمیان کولمبو میں شیڈول ہے۔
دو ٹیسٹ میچز پر مشتمل یہ ٹیسٹ سیریز آئی سی سی ورلڈ ٹیسٹ چیمپئن شپ کا حصہ ہے اور دونوں ٹیموں کے لیے انتہائی اہمیت کی حامل ہے۔