یوکرین سے اناج سے لدا پہلا کارگو جہاز ترکیہ کے دارالحکومت استنبول پہنچ گیا۔
خبر ایجنسی کے مطابق یوکرین نے اناج کی سپائی 22 جولائی کے معاہدے کے بعد شروع کی ہے، معاہدے کے تحت یوکرین 23 ملین ٹن اناج عالمی مارکیٹ کو فراہم کرے گا، یہ معاہدہ اقوام متحدہ اور ترکی کی ثالثی میں طے ہوا تھا۔
واضح رہے کہ یوکرین کی بندرگاہ اوڈیسا سے اناج سے بھرا کارگو جہاز یکم اگست کو روانہ ہوا تھا۔
استنبول میں قائم جوائنٹ کوآرڈینیشن سینٹر نے بتایا کہ یوکرین سے روانہ ہونے والے پہلے کارگو جہاز پر 26 ہزار ٹن سے زائد مکئی لدی ہے۔
دوسری جانب اقوام متحدہ کے سیکریٹری جنرل انتونیو گوتریس نے یوکرین سے اناج سے لدے جہاز کی روانگی کا خیرمقدم کیا تھا۔
Advertisement
اقوام متحدہ کے سیکریٹری جنرل انتونیو گوتریس کے ترجمان کا یہ بھی کہنا تھا کہ امید ہے معاہدے کے مطابق یوکرین سے اناج کی برآمدگی کا سلسلہ جاری رہے گا اور اناج برآمدگی کی بحالی سے عالمی غذائی ضروریات کی صورت حال مستحکم ہو گی۔
یاد رہے کہ روس اور یوکرین دنیا میں اناج برآمد کرنے والے بڑے ممالک میں شامل ہیں۔ یوکرین پر روسی حملے کے بعد یوکرینی اناج کی برآمدات میں خلل پڑنے سے دنیا کے کئی ممالک کو اشیائے خوردونوش کی قیمتوں میں اضافے اور اس کے نتیجے میں مہنگائی کا سامنا ہے۔
Advertisement