بھارتی براڈ کاسٹر کا آئندہ پاک بھارت میچ کے لیے ’موقع موقع‘ اشتہار نہ بنانے کا فیصلہ

By admin On اگست 4, 2022

بھارتی براڈ کاسٹر اسٹار اسپورٹس نے آئندہ پاک بھارت میچ کے لیے ’موقع موقع‘ اشتہار نہ بنانے کا فیصلہ کیا ہے۔

خبر رساں ادارے کے مطابق معروف بھارتی نشریاتی ادارے اسٹار اسپورٹس نے ایشیاکپ 2022 میں ہونے والے پاک بھارت میچز کے لیے اپنی بدنام زمانہ اشتہاری سیریز ’موقع موقع‘ نہ بنانے کا فیصلہ کیا ہے۔

واضح رہے کہ ’موقع موقع‘ مہم بھارت میں بہت مشہور رہی ہے جس کو بھارتی براڈ کاسٹر اسٹار اسپورٹس نے 2015 کے آئی سی سی ورلڈ کپ میں پاک بھارت میچ سے قبل بنایا تھا۔

اس اشتہار کا مقصد ورلڈ کپ میں پاکستان کے بہترین ریکارڈ کا مزاق اڑانا تھا تاہم اب براڈ کاسٹر نے اس سیریز کو مزید جاری نہ رکھنے کا فیصلہ کیا ہے۔

رپورٹس کے مطابق اس اشہاری مہم کو جاری نہ رکھنے کی ایک بڑی وجہ گذشتہ پاک بھارت مقابلے میں بھارت کی ذلت آمیز شکست کو قرار دیا جارہا ہے۔

یاد رہے کہ 2021 میں ہونے والے ٹی ٹوئنٹی ورلڈ کپ میں پاکستان نے بابر اعظم کی قیادت میں بھارت کو دس وکٹوں سے بدترین شکست دی تھی۔

دوسری جانب ایشیا کپ 2022 رواں برس 27 اگست سے 11 ستمبر تک متحدہ عرب امارات میں کھیلا جائے گا جس کے تمام میچز دبئی اور شارجہ میں کھیلے جائیں گے۔

ابتدائی میچ سری لنکا اور افغانستان کے درمیان 27 اگست کو دبئی میں کھیلا جائے گا جبکہ ایونٹ کا فائنل میچ 11 ستمبر کو دبئی میں کھیلا جائے گا۔

روایتی حریف پاکستان اور بھارت 28 اگست کو دبئی میں ہی مد مقابل آئیں گے جبکہ پاکستان اور بھارت 28 اگست کو گروپ مرحلے کے بعد ممکنہ طور پر سپر فور اور پھر فائنل میں بھی مدمقابل آسکتے ہیں۔