مقبوضہ کشمیر؛ ریاستی دہشت گردی میں 3 اور کشمیری نوجوان شہید
سری نگر: بھارت کے غیر قانونی زیر قبضہ مقبوضہ کشمیر میں بھارتی فوج نے 3 اور کشمیری نوجوانوں کو شہید کردیا ہے۔
کشمیر میڈیا سروس کی رپورٹ کے مطابق غیر قانونی طور پر بھارت کے زیر قبضہ جموں و کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران آج ضلع بارہمولہ میں 3 اور کشمیری نوجوانوں کوشہید کردیا ہے۔
رپورٹ کے مطابق فوجیوں نے نوجوانوں کو ضلع کے علاقے کمل کوٹ میں ایک پرتشدد کارروائی کے دوران شہید کیا ہے۔
علاوہ ازیں بھارتی فوجیوں نے آج ضلع بانڈی پورہ کے علاقے پیتھ کوٹ میں تلاشی اور محاصرے کی کارروائی کے دوران 2 کشمیری نوجوانوں کو گرفتار کرلیا ہے جن کی شناخت محمد یوسف اور منظور احمد کے نام سے ہوئی ہے۔
دوسری جانب بھارتی فوج، پیراملٹری فورس اور خفیہ ایجنسیوں کے اہلکاروں نے سری نگر، کپواڑہ، بڈگام، پلوامہ، اسلام آباد، شوپیاں، کولگام، رام بن، کشتواڑ، ڈوڈہ، راجوری، پونچھ، کٹھوعہ اور سانبہ اضلاع کے مختلف علاقوں میں بھی تلاشی کی جاری کارروائیوں کے دوران گھروں پر چھاپے مارے ہیں۔
Advertisement