جاپان کی موسمیاتی ایجنسی نے خبردار کیا ہے کہ خطے کو تیز ہواؤں، طوفانی بارشوں اور طوفانی لہروں سے ایسے خطرے کا سامنا ہے جس کی نظیر نہیں ملتی۔
غیر ملکی خبر رساں ادارے کے مطابق جاپان کے مغربی علاقوں کی طرف بڑھتے ہوئے سمندری طوفان نان ماڈول کے پیش نظر حکام نے 30 لاکھ افراد سے انخلا کی اپیل کی ہے۔
رپورٹ کے مطابق حکام کی اپیل کے بعد ہزاروں لوگ اس وقت پناہ گاہوں میں موجود ہیں جب کہ مقامی ٹرانسپورٹ کے حکام نے طوفان کے گزرجانے تک علاقائی ٹرین سروس، پروازیں اور بحری جہازوں کا سفر منسوخ کردیا ہے۔
جاپان کی موسمیاتی ایجنسی نے خصوصی وارننگ جنوبی کیوشو پریفیکچر میں کاگو شیما کے علاقے کے لیے جاری کی ہے جب کہ اس دوران تیز ہوائیں، طوفانی بارشوں اور طوفانی لہروں کا خدشہ ہے۔
Advertisement
جاپان کی موسمیاتی ایجنسی کے یونٹ کے سربراہ نے اس طوفان کو خطرناک قرار دیتے ہوئے کہا کہ ’اس وقت زیادہ سے زیادہ احتیاط کی ضرورت ہے‘۔
انہوں نے بتایا کہ طوفان کے دوران ہوا اتنی تیز ہوگی کہ کچھ مکانات کے گرنے کا خطرہ ہے جب کہ سیلاب اور لینڈ سلائیڈنگ کا انتباہ بھی جاری کیا گیا ہے۔
موسمیاتی ایجنسی کے یونٹ کے سربراہ نے لوگوں سے اپیل کی ہے کہ وہ طوفان آنے سے قبل علاقے سے نکل جائیں جب کہ انہوں نے خبردار بھی کیا کہ مضبوط عمارتوں میں بھی لوگوں کو احتیاط برتنے کی ضرورت ہے۔
انہوں نے مزید کہا کہ اس سے پہلے کے شدید ہوائیں چلنے لگیں، براہ مہربانی کسی مضبوط عمارت میں چلیں جائیں جب کہ عمارتوں کے اندر بھی کھڑکیوں سے دور رہیں۔
رپورٹس کے مطابق تاحال ابھی تک کسی کے زخمی ہونے یا کسی عمارت کو نقصان پہنچنے کی کوئی اطلاع موصول نہیں ہوئی ہے۔
Advertisement
واضح رہے کہ طوفان نان ماڈول آج صبح نو بجے تک جاپان کے یاکوشیما جزیرے سے 80 کلو میٹر مشرق میں موجود تھا جو کہ 252 کلو میٹر فی گھنٹہ کی رفتار سے پھیل رہا ہے۔
رپورٹس ہیں کہ یہ طوفان اتوار کی شام تک کیوشو میں زمین تک پہنچے گا جب کہ بدھ کے اوائل تک جاپان کے مرکزی جزیرے کا رخ کرے گا۔
Advertisement