چیئرمین پی سی بی کی شاہین شاہ کو تنہا چھوڑ دینے سے متعلق خبروں کی تردید

By admin On ستمبر 18, 2022

چیئرمین پی سی بی رمیز راجہ نے شاہین شاہ کو تنہا چھوڑ دینے سے متعلق خبروں کی تردید کردی ہے۔

خبر رساں ادارے کے مطابق پاکستان کرکٹ بورڈ کے چیئرمین رمیز راجہ نے فین فورم پر مداحوں کے سوالوں کے جوابات دیے جس میں ان کا کہنا تھا کہ ’یہ کہنا غلط ہے کہ پی سی بی شاہین شاہ کا ساتھ نہیں دے رہا‘۔

انہوں نے کہا کہ شاہین شاہ قومی ٹیم کے اہم فاسٹ بولر ہیں اور ان کو تنہا چھوڑنے سے متعلق یہ بحث غیر ضروری ہے۔

رمیز راجہ نے کہا کہ ایسا ممکن نہیں کہ بورڈ اپنے اسٹار کھلاڑی کو تنہا چھوڑدے، شاہین شاہ کو پی سی بی کا مکمل تعاون حاصل ہے اور برطانیہ میں ان کے ساتھ ڈاکٹرز کی ٹیم موجود ہے۔

چیئرمین پی سی بی کہتے ہیں ورلڈ کپ میں جب وکٹ کیپر و بیٹر محمد رضوان کی طبیعت خراب ہوئی تھی تو بورڈ نے اپنے کھلاڑی کی خدمت کی تھی جب کہ ڈاکٹرز نے رات جاگ کر کھلاڑی کو ٹھیک کیا تھا جس وجہ سے وہ فائنل کھیلنے کے قابل ہوئے تھے۔

انہوں نے مزید کہا کہ اسی طرح فخرزمان بھی اب جارہے ہیں اور انہیں بھی بورڈ کا مکمل تعاون حاصل ہے، جتنا ہم اپنے کھلاڑیوں کے لیے کرتے ہیں کوئی دوسرا بورڈ نہیں کرتا۔

واضح رہے کہ اس سے قبل شاہد آفریدی نے پی سی بی پر الزام عائد کیا تھا کہ وہ شاہین شاہ کی مدد نہیں کررہے جب کہ شاہین شاہ اپنے ہی ٹکٹ پر برطانیہ گئے ہیں اور وہ اپنے پیسوں پر وہاں رہ رہے ہیں، میں نے وہاں ان کے لیے ڈاکٹر کا بندوبست کیا ہے‘۔

شاہد آفریدی کا کہنا تھا کہ پی سی بی اس سب میں کچھ نہیں کررہا، جہاں تک میں جانتا ہوں وہ وہاں رہنے اور ڈاکٹروں کے ساتھ ہم آہنگی کے لیے خود سے ہی سب کچھ کررہے ہیں۔