بین الاقوامی ریسلرز کی پاکستان آمد

By admin On اکتوبر 4, 2022

ملتان: رنگ آف پاکستان کے زیر انتظام بین الاقوامی ریسلرز پاکستان پہنچ گئے ہیں۔

ملتان میں بین الاقوامی ریسلرز کی آمد اور سیلاب متاثرین کے فنڈ ریزنگ کے حوالے سے ڈی ایچ اے ملتان میں پریس بریفننگ دی گئی۔

اس موقع پر بریگیڈیئر شعیب انور کیانی کا کہنا تھا کہ پاکستان آنے والے تمام ریسلرز کو خوش آمدید کہتے ہیں، ڈی ایچ اے نے شہر اولیاء میں دو انٹرنیشنل ایونٹ کروائے ہیں۔

انہوں نے کہا کہ رنگ آف پاکستان کو ملتان میں پہلی بار منعقد کروارہے ہیں جب کہ اس ایونٹ میں پچیس سے تیس کھلاڑی اپنے داؤ آزمائیں گے۔

ان کا مزید کہنا تھا کہ ملتان شہر کو نہ صرف پاکستان بلکہ انٹرنیشنل لیول پر پرموٹ کرنا ہے۔

چیئرمین رنگ آف پاکستان عاصم علی شاہ نے کہا کہ ویژن والے آدمی کو ویژن والی چیزیں نظر آتی ہیں، ربیع الاول کے بابرکت مہینے کی آپ سب کو مبارک ہو۔

عاصم علی شاہ کہتے ہیں کچھ ماہ پہلے ہم نے سیلاب کی صورت میں آسمانی آفت کا سامنا کیا، ہماری کوشش تھی کہ ہم ان سیلاب متاثرین کے لیے کچھ کریں۔

انہوں نے کہا کہ 2016 میں پاکستان میں انٹرنیشنل ریسلرز لے کر آنا کسی معجزے سے کم نہیں تھا، اب انٹرنیشنل ریسلرز کے آنے سے سیلاب متاثرین کی مدد ہوسکے گی۔

عاصم علی شاہ کا کہنا تھا کہ رنگ آف پاکستان کو مختلف شہروں میں متعارف کروارہے ہیں۔

اس موقع پر رنگ آف پاکستان کے سی ای او عمران شاہ نے کہا کہ ہم اوور سیز پاکستانی اپنے ملک کو بہت مس کرتے ہیں، ہماری یہی کوشش رہی ہے کہ پاکستان کی عوام کے لئے کچھ نیا کیا جائے۔

اس مقابلے میں بیس ممالک کے پچیس کھلاڑی شرکت کررہے ہیں، پہلی دفعہ ملتان آیا ہوں اور یہاں آکر بہت اچھا لگا۔ جب یہ لوگ یہاں سے جائیں گے تو سپر سٹارز بن کر جائیں گے۔

واضح رہے کہ بین الاقوامی ریسلرز کی آمد کا مقصد پاکستان میں کھیلوں کا فروغ اور سیلاب متاثرین کی امداد کرنا ہے۔

ان ریسلرز میں ماریا مے، ٹینی آئرن، بادشاہ پہلوان خان، امالی دیب اور آدم فلیکس شامل ہیں جب کہ بین الاقوامی ریسلرز آج ڈی ایچ اے اسپورٹس کمپلیکس ملتان میں اپنے جوہر دکھائیں گے۔

اس موقع پر مختلف یونیورسٹیز اور کالجز کے طلباء و طالبات ان کا بھر پور استقبال کریں گے جب کہ ریسلرز ڈی ایچ اے میں قائم فلڈ ریلیف کیمپ کا دورہ بھی کریں گے۔