گوتم گمبھیر نے بابر اعظم کو خود غرض کپتان قرار دے دیا
بھارت اور زمبابوے کے خلاف مسلسل دو شکستوں کے بعد پاکستان نے پرتھ کے اوپٹس گراؤنڈ میں نیدر لینڈز کے خلاف ٹی ٹوئنٹی ورلڈ کپ سپر 12 گروپ مرحلے کا پہلا میچ جیت لیا ہے۔
نیدر لینڈز کے خلاف میچ میں بائیں ہاتھ کے بیٹر فخر زمان کی پاکستان ٹیم میں واپسی ہوئی ہے جس میں انہیں تیسرے نمبر پر بیٹنگ پر بھیجا گیا تھا جب کہ کپتان بابر اعظم نے اوپننگ کی تھی۔
گذشتہ روز کمنٹری کرتے ہوئے سابق بھارتی بیٹر گوتم گمبھیر نے بابر اعظم کو شدید تنقید کا نشانہ بناتے ہوئے انہیں خود غرض کپتان قرار دیا ہے۔
Advertisement
انہوں نے کہا کہ ’میرے خیال میں بابر کو اپنی بجائے پہلے ٹیم کے بارے میں سوچنا چاہیے‘ اگر آپ کے پلان کے مطابق کچھ نہ ہو تو آپ کو فخرزمان کو بیٹنگ آرڈر پر بھیجنا چاہیے تھا، اس کو خود غرضی کہتے ہیں، بطور کپتان خود غرض ہونا آسان ہوتا ہے۔
ان کا کہنا تھا کہ ’بابر اور رضوان کے لیے پاکستان کے لیے اننگز کا آغاز کرنا اور بہت سارے ریکارڈ بنانا آسان ہے لیکن اگر آپ لیڈر بننا چاہتے ہیں تو آپ کو اپنی ٹیم کے بارے میں سوچنا ہوگا‘۔
گوتم گمبھیر کا مزید کہنا تھا کہ ’بہت سے کپتان ہیں لیکن لیڈر چند ہی ہیں‘ نیدر لینڈز کے خلاف میچ میں بابر اعظم کو مثال قائم کرنی چاہیے تھی اور اپنی بجائے فخر زمان کو اوپنر بھیجنا چاہیے تھا۔
واضح رہے کہ شعیب اختر، وسیم اکرم اور محمد حفیظ جیسے کئی نامور کھلاڑیوں نے بابر اعظم کی خراب کپتانی پر تنقید کا نشانہ بناتے ہوئے انہیں مڈل آرڈر پر بیٹنگ کرنے کا مشورہ دیا ہے۔