کیا پاکستان اب بھی سیمی فائنل میں پہنچ سکتا ہے؟

By admin On نومبر 2, 2022

بھارت نے ٹی ٹوئنٹی ورلڈ کپ کے سپر 12 مرحلے میں بنگلادیش کو شکست دے دی ہے جس کے بعد پاکستان کی سیمی فائنل تک رسائی مزید مشکل ہوگئی ہے۔

آسٹریلیا میں ٹی ٹوئنٹی ورلڈ کپ سپر 12 مرحلے کے میچز جاری ہیں جس میں آج بھارت کا مقابلہ بنگلادیش سے ہوا، اس میچ میں بھارت نے 5 رنز سے کامیابی اپنے نام کی۔

بھارت کی بنگلادیش کو شکست کے بعد قومی ٹیم کی سیمی فائنل تک رسائی مزید مشکل ہوگئی ہے تاہم ایک صورت میں پاکستان اب بھی سیمی فائنل میں پہنچ سکتا ہے۔

اگر پوائنٹس ٹیبل کی بات کریں تو گروپ 2 میں بھارت 6 پوائنٹس کے ساتھ سر فہرست ہے جب کہ جنوبی افریقہ کے 5 پوائنٹس اور پاکستان کے صرف 2 پوائنٹس ہیں۔

بھارت کا اب صرف ایک میچ باقی ہے جب کہ جنوبی افریقہ اور پاکستان نے مزید 2،2 میچز کھیلنے ہیں، دونوں ٹیمیں کل سڈنی گراؤنڈ میں ٹکرائیں گی۔

اگر کل پاکستان کامیابی حاصل کرلیتا ہے تو 4 پوائنٹس ہوجائیں گے لیکن اگر مگر کی صورت حال اب بھی برقرار رہے گی۔

گروپ 2 سے سیمی فائنل تک رسائی کرنے والی ٹیموں کا فیصلہ اتوار کو ہوگا کیونکہ اتوار کو پاکستان بنگلادیش سے ٹکرائے گی جب کہ جنوبی افریقہ کا مقابلہ نیدرلینڈز سے اور بھارت کا زمبابوے سے ہوگا۔

اگر ہم ٹیموں کی اسٹرینتھ کی بات کریں تو بھارت اور جنوبی افریقہ کے آخری میچز آسان ہیں اور اگر کوئی اپ سیٹ نہ ہوا تو بھارت کے 8 اور جنوبی افریقہ کے 7 پوائنٹس ہوجائیں گے۔

ایسے میں اگر پاکستان بنگلادیش سے جیت بھی جاتا ہے تو سیمی فائنل تک نہیں پہنچ پائے گا کیونکہ ان کے پوائنٹس صرف 6 ہی ہوں گے۔

اس صورت حال میں ضروری ہے کہ پاکستان اپنے اگلے دونوں میچز ضرور جیتے کیونکہ اگر ان دونوں ٹیموں میں سے کسی کو اپ سیٹ شکست ہوئی یا بارش کی وجہ سے جنوبی افریقہ اور نیدر لینڈز کے درمیان ہونے والا میچ واش آؤٹ ہوجائے تو جنوبی افریقہ کے بھی 6 پوائنٹس رہیں گے۔

اس وقت جنوبی افریقہ کا رن ریٹ 2.722 ہے اور پاکستان کا 0.765 ہے جب کہ پاکستان کا میچ جنوبی افریقہ کے میچ کے بعد ہے جس کی وجہ سے پاکستان کو اپنے نیٹ ریٹ کے ہدف کا اندازہ ہوسکتا ہے۔

یہ بھی پڑھیں: بھارت کو پہلی شکست، پاکستان کے سیمی فائنل تک رسائی کے امکانات معدوم

تاہم محکمہ موسمیات کی جانب سے اتوار کو ایڈیلیڈ میں موسم صاف رہنے کا امکان ظاہر کیا جارہا ہے یعنی بارش کا ابھی کوئی امکان نہیں۔

واضح رہے کہ اگر کل پاکستان کو جنوبی افریقہ سے شکست ہوجاتی ہے تو اگر مگر کی صورت حال بھی ختم ہوجائے گی اور اتوار کو بنگلادیش کے خلاف میچ صرف رسمی رہ جائے گا۔