بھارت کے مشہور وال (دیوار) آرٹسٹ گرسیت سنگھ نے اپنے پسندیدہ بھارتی سپر اسٹار کھلاڑی کے اعزاز میں منفرد تصویر بنائی۔
تفصیلات کے مطابق بھارت کے معروف وال آرٹسٹ گرسیت سنگھ نے بھارتی کرکٹ ٹیم کے اسٹار بلے باز ویرات کوہلی کی تصویر بنائی، یہ تصویر اس لحاظ سے منفرد اور دلچسپ ہے کہ اس میں برش اور رنگ کے بجائے کرکٹ کی ریڈ بال کا استعمال کیا گیا۔
بھارتی میڈیا کی رپورٹ کے مطابق گرسیت سنگھ نے ویرات کوہلی کے مداحوں کے ساتھ مل کر بھارتی ٹیم کے اسٹار بیٹسمین ویرات کوہلی کے چہرے کا 20 بائے 20 فٹ کی ایک تصویر کرکٹ کی ریڈ بال سے بنائی۔
یہ تصویر ممبئی کے کارٹر روڈ ایمفی تھیٹر پر بنائی گئی، اس تصویر کو بنانے میں 9 گھنٹے کا وقت لگا، ویرات کوہلی کے سیکڑوں مداحوں نے اس قد آور تصویر کی تیاری میں وال آرٹسٹ گرسیت سنگھ کا بھرپور ساتھ دیا۔
Advertisement
جبکہ اس تصویر کو بنانے کے لیے اسپانسر شپ کھیلوں کے سامان کے حوالے سےمشہور ایک بین الاقوامی کمپنی کے پاس تھی۔
ویرات کوہلی کو خراج تحسین پیش کرنے کے لیے اس تصویر کو بنانے کا آغاز صبح 8 بجے ہی شروع ہو گیا تھا، اس موقع پر ویرات کوہلی کے بچپن کے کوچ راج کمار شرما بھی موجود تھے۔
کوچ راج کمار شرما نے کہا کہ یہ ایک حیرت انگیز اور بہت ہی تخلیقی کام ہے، اور مجھے ویرات کو مداحوں کی جانب سے اتنا پیار ملتے ہوئے دیکھ کر بہت فخر محسوس ہو رہا ہے۔
کھیلوں کا سامان بنانے والی کمپنی کے بھارت کے مینجنگ ڈائریکٹر ابھیشک گنگولی نے اس موقع پر کہا کہ ویرات کوہلی جدید دور کی کرکٹ کے لیجنڈ ہیں اور وہ شائقین کے دل میں ایک خاص مقام رکھتے ہیں۔
ابھیشک نے مزید کہا کہ ہماری کوشش تھی کہ ہم ان سب کو اکٹھا کریں اور اسے اس دور کے سب سے مکمل بلے بازوں میں ایک کی سالگرہ کا خصوصی جشن منائیں۔
Advertisement