ٹی ٹوئنٹی ورلڈ کپ: اگر مگر ختم، پاکستان سیمی فائنل میں پہنچ گیا

By admin On نومبر 6, 2022

ٹی ٹوئنٹی ورلڈ کپ سپر 12 مرحلے کے میچ میں پاکستان بنگلادیش کو شکست دے کر سیمی فائنل میں پہنچ گیا ہے۔

ٹی ٹوئنٹی ورلڈ کپ کے سپر 12 مرحلے میں آج پاکستان کا مقابلہ بنگلادیش کی ٹیم سے ہوا جس میں پاکستان میں باآسانی کامیابی حاصل کرکے سیمی فائنل تک رسائی حاصل کرلی ہے۔

اس میچ میں بنگلادیش نے ٹاس جیت کر بیٹنگ کا فیصلہ کیا اور پاکستان کو جیت کے لیے 128 رنز کا ہدف دیا جس کو قومی ٹیم نے 18.1 اوورز میں پورا کرلیا۔

بنگلادیش کی بیٹنگ

بنگلادیش نے مقررہ 20 اوورز میں 8 وکٹوں کے نقصان پر 127 رنز اسکور کیے جب کہ بنگلادیش کی جانب سے نجم الحسن شنتو نے عمدہ بیٹنگ کا مظاہرہ کیا اور 48 گیندوں پر نصف سنچری کی بدولت 54 رنز بنائے۔

علاوہ ازیں سومیا سرکار 20 رنز بناکر پویلین لوٹے جب کہ عاطف حسین 24 رنز بناکر ناٹ آؤٹ رہے۔

پاکستان کی جانب سے شاہین آفریدی نے ایک مرتبہ پھر کامیاب بولنگ اسپیل پھینکا اور 4 وکٹیں لینے میں کامیاب رہے جب کہ شاداب خان نے 2 وکٹیں حاصل کیں، حارث رؤف اور افتخار احمد ایک ایک وکٹ لینے میں کامیاب رہے۔

پاکستان کی بیٹنگ

پاکستان کی جانب سے اوپننگ کا آغاز کپتان بابر اعظم اور وکٹ کیپر محمد رضوان نے کیا، محمد رضوان 32 رنز بناکر آؤٹ ہوئے جب کہ بابر اعظم نے 25 رنز اسکور کیے۔

محمد حارث ایک مرتبہ پھر جارحانہ بلے بازی کا مظاہرہ کرتے ہوئے 18 گیندوں پر 31 رنز بنانے میں کامیاب رہے جب کہ شان مسعود 24 رنز بناکر ناٹ آؤٹ رہے۔

پاکستان نے مقررہ ہدف 18.1 اوورز میں 5 وکٹوں کے نقصان پر پورا کرلیا جب کہ بنگلادیش کی جانب سے نسوم احمد، شکیب الحسن، مستفیظ الرحمان اور عبادت حسین نے ایک ایک وکٹ حاصل کی۔

واضح رہے کہ پاکستان کرکٹ ٹیم چھٹی مرتبہ ٹی ٹوئنٹی ورلڈ کپ کے سیمی فائنل میں پہنچنے والی ٹیم بن گئی ہے۔