چیف سلیکٹر محمد وسیم نے فواد عالم کو ٹیسٹ اسکواڈ سے باہر کرنے کی وجہ بتادی

By admin On نومبر 26, 2022

پاکستان کرکٹ بورڈ (پی سی بی) کے چیف سلیکٹر محمد وسیم نے انگلینڈ کے خلاف آئندہ ٹیسٹ سیریز کے لیے مڈل آرڈر بلے باز فواد عالم کو ڈراپ کرنے کی وجہ بتادی ہے۔

فواد عالم نے رواں سال کے شروع میں آسٹریلیا کے خلاف تین ٹیسٹ میچز کی سیریز کی چار اننگز میں 33 رنز بنائے تھے جب کہ انہوں نے سری لنکا کے خلاف اپنے واحد ٹیسٹ میچ میں 25 رنز اسکور کیے تھے۔

چیف سلیکٹر محمد وسیم کہتے ہیں کہ فواد عالم ایک فائٹر ہیں، انہوں نے طویل عرصے کے بعد قومی ٹیم میں واپسی کے بعد اچھی کارکردگی کا مظاہرہ کیا، تاہم وہ پچھلی تین سیریز میں اچھی کارکردگی کا مظاہرہ نہیں کر سکے تھے جس کی وجہ سے ہم نے سعود شکیل کو منتخب کیا۔

واضح رہے کہ 2009 میں سری لنکا کے خلاف اپنے پہلے ٹیسٹ میچ میں سنچری بنانے کے باوجود فواد عالم کو دو میچز کے بعد پاکستان کے اسکواڈ سے ڈراپ کر دیا گیا تھا۔

ایک دہائی سے زائد عرصے کے بعد فواد عالم نے 2020 کے دورہ انگلینڈ کے موقع پر قومی ٹیم میں واپسی کی، 37 سالہ کھلاڑی نے 19 ٹیسٹ میچ میچز میں 38.88 کی اوسط سے 1011 رنز بنائے جس میں پانچ سنچریاں اور دو نصف سنچریاں شامل ہیں۔

خیال رہے کہ پاکستان اور انگلینڈ کے درمیان ٹیسٹ سیریز کا آغاز یکم دسمبر سے ہونے جارہا ہے۔

سیریز کا پہلا ٹیسٹ میچ یکم دسمبر سے 5 دسمبر کے دوران راولپنڈی میں کھیلا جائے گا جب کہ دوسرا 9 تا 13 دسمبر ملتان اور تیسرا 17 تا 21 دسمبر کے دوران کراچی میں شیڈول ہے۔