دبئی میں14 اکتوبر سے شروع ہونے والی دنیا کی سب سے بڑیٹیکنالوجی نمائش”جائٹیکس” میں پاکستان کی نمایاں شرکت۔
دبئی(اردوویکلی)::دنیا کی سب سے بڑی ٹیکنالوجی نمائش ”جی آئی ٹی ای ایکس،(جائٹیکس) گلوبل2024جو ” 14 سے 18 اکتوبر تک دبئی میں منعقد ہو رہی ہے جس میں پاکستان آئی ٹی کے شعبے میں اپنی بڑھتی ہوئی صلاحیتوں کا مظاہرہ کرتے ہوئے 24 سرکردہ نمائش کنندگان کے ساتھ نمایاں شرکت کریگا۔ سفارت خانہ پاکستان کی جانب سے جاری پریس ریلیز کے مطابق متحدہ عرب امارات میں پاکستان کے سفیر فیصل نیاز ترمذی نے اس اہم بین الاقوامی نمائش میں پاکستان کی شرکت کی اہمیت پر زور دیتے ہوئے کہا کہ پاکستان کو اس گلوبل نمائش کی جانب سے ٹیک ڈیسٹینیشن آف دی ایئر 2024 کے طور پر تسلیم کیے جانے پر فخر ہے جو آئی ٹی اور ٹیک انڈسٹریز میں ہمارے ملک کی ترقی کا منہ بولتا ثبوت ہے۔
سفیرپاکستان فیصل نیاز ترمذی نے کہا کہ یہ اعتراف پاکستان کی ڈیجیٹل جدت اور انٹرپرینیورشپ کے ابھرتے ہوئے مرکز کے طور پر اس کی حیثیت کو مزید تقویت دیتا ہے۔فیصل ترمذی نے اس بات پر زور دیا کہ” جی آئی ٹی ای ایکس گلوبل” کمپنیوں کے لیے عالمی ٹیک لیڈرز، سرمایہ کاروں اور ممکنہ شراکت داروں سے رابطہ قائم کرنے کے لیے ایک مثالی پلیٹ فارم پیش کرتا ہے۔ انہوں نے کہا کہ ہمارے نمائش کنندگان کے لیے یہ ایک منفرد موقع ہے کہ وہ اس نمائش سے بھرپورفائدہ اٹھاتے ہوئے اپنی صلاحیتوں کا مظاہرہ کریں اور تعاون کی نئی راہیں تلاش کریں۔
