ورلڈ ٹریڈ سینٹردبئی میں منعقدہ انٹرسیک 2025 میں پاکستانی کمپنیوں کی شرکت
قونصل جنرل پاکستان حسین محمدنے پاکستان پویلین کا افتتاح کیا۔
دبئی۔(اردوویکلی)::پاکستانی کمپنیاں دبئی ورلڈ ٹریڈ سینٹر میں منعقدہ انٹرسیک 2025 میں شرکت کر رہی ہیں ، قونصل جنرل پاکستان حسین محمد نے پاکستان کے پویلین کا افتتاح کیا ۔ سلامتی، تحفظ اور آگ سے محفوظ بنانے کے لیے دنیا کی سب سے بڑی کاروباری نمائش انٹرسیک 2025 کا 26 واں ایڈیشن 14 سے 16 جنوری تک دبئی ورلڈ ٹریڈ سینٹر میں منعقد ہو رہا ہے۔ اس سال ٹریڈ ڈویلپمنٹ اتھارٹی آف پاکستان (ٹی ڈی اے پی) کے زیر اہتمام 08 پاکستانی کمپنیاں اپنی مصنوعات کی نمائش کے لیے ایونٹ میں شرکت کر رہی ہیں۔ قونصل جنرل پاکستان حسین محمد نے تجارت اور سرمایہ کاری کے قونصلر علی زیب خان کے ہمراہ پاکستانی پویلین کا افتتاح کیا۔ پاکستانی نمائش کنندگان نے ایونٹ کے انتظامات اور قونصل خانہ پاکستان کے زریں تعاون پر مکمل اطمینان کا اظہار کیا اور متحدہ عرب امارات اور دیگر خلیجی ممالک کی مارکیٹوں میں پاکستان کی برآمدی صلاحیت کو بڑھانے کےلئے ایسے پلیٹ فارمز کی اہمیت پر زور دیا۔ قونصلر جنرل نے کہا کہ انٹر سیک جیسی عالمی نمائشوں میں شرکت پاکستان کے تجارتی تعلقات کو فروغ دینے اور سکیورٹی کے شعبے میں اپنی صلاحیتوں کے اظہار کے عزم کو واضح کرتی ہے۔ حسین محمد نے مزید کہا کہ یہ تقریب پاکستانی کمپنیوں کو عالمی مارکیٹ تلاش کرنے اور کاروباری روابط بڑھانے کا ایک مثالی موقع فراہم کرے گی
