سفیر فیصل نیاز ترمذی کی طلباء کو سپورٹس مقابلوں میں شاندار کامیابی پر مبارکباد
ابراہیم سعیدنے 100میٹرکی دوڑمیں کانسی کاتمغہ جیتا
بدرحامدنے ہائی جمپ مقابلے میں کانسی کاتمغہ جیت کراسکول کانام روشن کیا
ابوظہبی۔(اردوویکلی)::متحدہ عرب امارات میں پاکستان کے سفیر فیصل نیاز ترمذی نے "پاکستان اسلامک سکول "العین کے طلباء کو ابوظہبی سپورٹس چیمپئن شپ 2024-25 میں نمایاں کامیابیوں پر دلی مبارکباد پیش کی ۔ طلباء نے غیر معمولی صلاحیتوں کا مظاہرہ کرتے ہوئے کانسی کے تمغے حاصل کیے اور العین ریجن میں چیمپئنز کا اعزاز حاصل کیا۔سفارت خانہ پاکستان ابوظہبی کی جانب سے جاری پریس ریلیزکے مطابق ابراہیم سعید نے 100 میٹر کی دوڑ میں کانسی کا تمغہ جیتا جبکہ بدر حامد نے ہائی جمپ مقابلے میں کانسی کا تمغہ حاصل کیا۔
دونوں طالب علموں کو العین ریجن میں چیمپئن کا تاج پہنایا گیا۔ 23 فروری 2025ء کو دونوں طالب علموں کو ابوظہبی میں شیخ زاید سپورٹس ہب میں مہمان خصوصی کی طرف سے تمغوں سے نوازا گیا۔ سفیرپاکستان فیصل نیاز ترمذی نے طلباء کی شاندار کارکردگی کی تعریف کی اور شخصیات کی تشکیل میں کھیلوں اور ہم نصابی سرگرمیوں کی اہمیت کو اجاگر کیا۔
سفیرفیصل نیاز ترمذی نے اس بات پر زور دیا کہ اس طرح کی سرگرمیاں طلباء میں نظم و ضبط، ٹیم ورک اور قائدانہ صلاحیتوں کو پروان چڑہانے میں اہم کردار ادا کرتی ہیں۔ سفیر نے پاکستان اسلامک سکول العین کی سکول انتظامیہ، اساتذہ اور سٹاف کی بھی تعریف کی اور طلباء کو بہترین ماحول فراہم کرنے میں ان کی کوششوں کو سراہا۔ انہوں نے متحدہ عرب امارات میں پاکستانی طلباء کی مجموعی ترقی کو فروغ دینے کے لئے اقدامات کی حمایت کے لیے سفارت خانے کے عزم کا اعادہ کیا۔
