مکہ مکرمہ میں عازمینِ حج کی رہائش کے لیے مختص کردہ عمارات کے مالکان کا کہنا ہے کہ رواں سال حج کے سیزن میں رہائشی کمرے کرائے پر لینے کے لیے زیادہ سے زیادہ عازمین حج رابطہ کر رہے ہیں۔
قومی کمیٹی برائے حج، عمرہ اور زیارات کے رکن اور مکہ مکرمہ میں ہوٹلز کمیٹی کے رکن ہانی العمیری نے کہا ہے کہ مکہ میں عازمینِ حج کے قیام کے لیے 3 ہزار سے زائد رہائش گاہیں مختص کی گئی ہیں۔
العمیری کے مطابق مکہ مکرمہ کے ہوٹلوں میں تقریباً 2 لاکھ 50 ہزار کمرے عازمینِ حج کے قیام کے لیے تیار ہیں۔ ان کمروں میں عازمین کی آسانی کے لیے عالمی معیار کی سہولیات فراہم کی گئی ہیں۔ ہوٹلوں میں حفظان صحت کے اصولوں کا خاص خیال رکھا گیا ہے اور سینی ٹائزر کے استعمال کو لازمی قرار دیا گیا ہے۔
کورونا کی عالمی وبا کی وجہ سے دو سال کے تعطل کے بعد مکہ مکرمہ کے مختلف رہائشی علاقوں میں عازمینِ حج کی رہائش کے لیے مختص کئی عمارتوں پر حج سیزن کے لیے کرائے پر دستیابی کے بینر نظر آ رہے ہیں۔
Advertisement
دوسری طرف حجاج کے لیے رہائشی انتظامات کی ذمہ دار کمیٹی نے عازمینِ حج کی رہائش کے لیے عمارتوں کے اجازت نامے جاری کرنے کی مدت ختم کر دی ہے۔
کمیٹی نے وضاحت کی ہے کہ مقدس شہر مکہ اور سول ڈیفنس کے سیکرٹریٹ کی طرف سے منظور شدہ متعدد مشاورتی انجینیئرنگ دفاتر کو عازمین کے لیے تیار کی گئی قیام گاہوں کا معائنہ کرنے کی ذمہ داری سونپی گئی تھی تاکہ جن ضوابط اور اصولوں کے تحت اجازت نامہ جاری کیا گیا تھا ان پر عملدرآمد کو یقینی بنایا جا سکے۔