امریکی شہر سان فرانسسکو کی ایک ٹرین میں پیش آنے والے فائرنگ کے واقعے میں ایک شخص ہلاک اور ایک زخمی ہو گیا جبکہ حملہ آور فائرنگ کے بعد فرار ہو گیا۔
خبر رساں اداے ایسوسی ایٹڈ پریس کے مطابق واقعہ گزشتہ روز پیش آیا۔ ٹرین میں اس وقت فائرنگ کی گئی جب وہ کیسٹرو نامی قصبے کی جانب بڑھ رہی تھی۔ جس اسٹیشن کے قریب حملہ آور فرار ہوا وہ سان فرانسسکو اور کیسٹرو کے تقریباً درمیان میں واقع ہے۔
سان فرانسسکو کی سپروائرز مائرنا میلگر کا کہنا ہے کہ واقعے کی اطلاع ملنے پر حکام وہاں پہنچے تو ایک شخص کو مردہ اور ایک کو زخمی حالت میں پایا جسے فوری طور پر ہسپتال منتقل کیا گیا۔ عینی شاہدین کا کہنا ہے کہ واقعے سے قبل فائرنگ کرنے والے اور نشانہ بننے والے افراد کے درمیان کسی بات پر تلخ کلامی ہوئی تھی جبکہ حملہ آور فائرنگ کے بعد فرار ہونے میں کامیاب ہو گیا۔
Advertisement
کیسٹرو کے سپروائزر رفائل مینڈلمین کا کہنا ہے کہ فائرنگ کرنے اور اس کا نشانہ بننے والے افراد کے بارے میں معلوم ہوا ہے کہ وہ ایک دوسرے کو پہلے سے جانتے تھے۔ انہوں نے کہا کہ ایسے کوئی شواہد نہیں ملے کہ کوئی ٹرین پر چڑھا اور فائرنگ شروع کر دی جو کہ بہت خوفناک ہو سکتا تھا تاہم یہ بھی کافی خوفناک تھا۔
خیال رہے امریکا میں فائرنگ کے پے در پے واقعات کے بعد ہتھیار رکھنے کے حوالے سے سخت قوانین بنانے کی بحث زوروں پر ہے۔ گزشتہ روز ہی امریکی سینیٹ نے کئی دہائیوں بعد ملک میں ہتھیاروں کی روک تھام کے لیے قانون منظور کرنے کی طرف پہلا قدم اٹھایا تھا۔ سینیٹ میں ہونے والی ووٹنگ میں ڈیموکریٹ اور رپبلکن سینیٹرز نے متفقہ طور پر شہریوں کے ہتھیار رکھنے کے قوانین (گن لاز) کو سخت کرنے کے اقدامات کی فوری منظوری کے حق میں ووٹ دیا تھا۔